Қала мен оның күре тамырына айналған өндіріс ошақтары үшін су мен жылу тіршіліктің басты көзі болып саналады. Жезқазған қаласын осы тіршілік нәрімен қамтып отырған «Жезқазған жылумен, сумен жабдықтау кәсіпорны» ЖШС жұмысы қалыптасқаннан бергі уақытта оның өзінің көлік бекетінің де жұмысы жолға қойылған.
Десе де сол бекеттегі көліктердің көбінің жағдайы қалжырап тұр. Бұл жағдайды ескерген Жезқазған қаласының әкімдігі көліктерді жаңалауға қолдау көрсетті.
Бүгінгі күні кәсіпорынның көлік бекеті өндірістік қажетке жарамды жаңа 10 техникамен толықты. Жезқазған қаласының 70 жылдығына орай «70 жылға – 70 игі іс» акциясы шеңберінде кәсіпорынның техникалық базасы жаңарды. «Жезқазған жылумен, сумен жабдықтау кәсіпорны» ЖШС бас механигі Андрей Дин қала басшылығының бұл игі ісі кәсіпорынның апаттық жағдайларды уақытылы жоюға көмегінің көп екендігін алға тартты.
– Біздің көлік бекетіндегі көліктердің тозу деңгейі 65 пайызды болып отыр. Техникалар моральдық тұрғыда тозды. Олар күрделі жөндеуді қажет етеді. Осыны ескерген қала әкімдігі 2023 жылы 10 техниканы алып берді. Бұл техникалардың көмегімен Жезқазған қаласындағы апаттық жағдайларды тез әрі шұғыл шешуге мүмкіндігіміз артты Он техниканың екеуі – вакуумдық техника, екі КамАЗ, бір автокөтергіш, бір «ТМЗ» тракторы, жұмысшыларды тасымалдайтын бір көлік пен екі дәнекерлеу агрегаты.
«Жезқазған жылумен, сумен жабдықтау кәсіпорны» ЖШС көлік бекетінде 95 адам жұмыс істейді. Олардың қатарында көлік жүргізушілері, слесарьлар, механизаторлар мен дәнекерлеушілер бар. Жасыратыны жоқ, бекеттің техникалары көптен бері жаңартылмаған болатын. Жезқазған қаласы әкімдігінің қаланың 70 жылдыған орай кәсіпорынға жасаған керемет тартуы болды деп білеміз. Шаһар басшылығы мұнымен шектелмей, таяу арада тағы 10 көлікпен қамтуды жоспарлап отыр. Қала әкімдігіне осындай қолдаулары үшін кәсіпорын басшылығы мен еңбеккерлері атынан алғысымызды білдіреміз, – деді Андрей Олегович.
Бағдат ҚАЗКЕНОВ.
