«Қазақмыс» өндірістік үдерістерді жетілдіру, қауіпсіздікті нығайту және геологиялық барлау жұмыстарын оңтайландыру мақсатында жасанды интеллект пен цифрлық технологияларды енгізуде.Цифрлық жаңғыртудың маңызды жобаларының бірі – 2026 жылғы қазанда Жезқазғанда ашылған Бірыңғай диспетчерлік орталық. Мұнда тау-кен өндірісі, кен байыту, теміржол логистикасы мен өнеркәсіптік қауіпсіздікке қатысты деректер бір жүйеге біріктірілген. Бұл өндіріс барысын бақылап, ақаулар мен ықтимал тәуекелдерді дер кезінде анықтауға мүмкіндік береді.
Өнеркәсіптік қауіпсіздік бағытында да цифрлық бақылау күшейтілуде. «Жомарт» кенішінде шахта атмосферасына тұрақты мониторинг жүргізіліп, газ талдағыштар мен арнайы датчиктер қолданылады. Сонымен қатар компанияның үш өңірдегі 59 нысанына қолжетімділікті бақылаудың бірыңғай жүйесі енгізілуде. Геологиялық барлау саласында биыл жалпы инвестиция көлемі 18,2 млн долларды құрайтын 20 жоба жүзеге асырылуда. Жезқазғандағы геологиялық кластерде ANCORELOG және LithoLens заманауи кешендері пайдаланылып, цифрлық геологиялық модельдер жасалуда. Шалғай учаскелерде Starlink спутниктік байланысы да қолданысқа енгізілген.Бұдан бөлек, кен өндіру мен байыту жабдықтарының техникалық жағдайын бақылау, ақауларды алдын ала анықтау және өндірістік тапсырмаларды автоматтандыру жұмыстары жүргізілуде. Компанияның цифрлық трансформациясы өндірістің барлық кезеңін қамтиды. Басты мақсат – еңбек қауіпсіздігін қамтамасыз ету, жабдықтардың сенімділігін арттыру, шығынды азайтып, өндіріс тиімділігін жаңа деңгейге көтеру.
ГҮЛІМ МАРАТҚЫЗЫ

