Металлургтердің мерекесі Балқаш қаласында да сән-салтанатымен өтті. Мерекелік түскі ас ұйымдастырылып, оған «Қазақмыс Смэлтинг» ЖШС құрылымдық бөлімшелерінің қызметкерлері қатысты.
Мерекелік дастарқан басына өз шеберлігін, еңбекке деген сүйіспеншілігін, ісіне деген адалдығын ұрпақтан ұрпаққа жеткізіп, өз қажырлы еңбегімен туған кәсіпорны мен қаласының даңқын қалыптастырғандар жиналды.
Балқаш қаласының әкімі Сапар Сатаев құттықтау арнап, облыс әкімінің Құрмет грамотасын мысты электролиздеу цехының газбен дәнекерлеуші Асқар Ақшпеков пен балқыту цехының кран машинисі Владимир Кимге табыс етті. Сондай-ақ, алты еңбеккер қала әкімінің Құрмет грамотасымен марапатталды.
Одан әрі сөз «Қазақмыс» корпорациясы» ЖШС Басқарма төрағасы Нұрахмет Нүриевке берілді, ол өзінің құттықтау сөзінде металлургия саласы мен металлургия мамандығының маңыздылығын атап өтті. Одан кейін кезек ҚР Индустрия және инфрақұрылымдық даму министрлігінің «Еңбек даңқы» салалық төсбелгісін тапсыру рәсіміне берілді.
«Қазақмыс Смэлтинг» ЖШС басқармасының бас маманы Марат Бекенов І дәрежелі «Еңбек даңқы» төсбелгісімен марапатталса, ІІ дәрежелі «Еңбек даңқы» төсбелгісіне мысты электролиздеу цехының су ерітінділерінің электролизшісі Дархан Жүнісов, учаске шебері Ербол Жақбеков, бағалы металл цехының компрессорлық қондырғыларының машинисі Мұхтар Сыздықов және күкірт-қышқылы цехының аға энергетигі Марат Сағадатов қол жеткізді.
ІІІ дәрежелі «Еңбек даңқы» төсбелгісін оттегі өндіру кәсіпорнының директоры Ермек Оспанов, балқыту цехының телім басшысы Ерлан Сыздықов, аталмыш цехтың конверторшысы Әнуарбек Жақыпбеков, мыс балқыту цехының түсті металл құюшысы Нұржан Жетпісов, аталмыш цехтың балқытушысы Муратбек Еспеков, мысты электролиздеу цехының өнім тазалаушы Асқар Әбдірбаев, осы цехтың басшысы Жасұлан Балапанов, Смэлтинг басқармасының еңбекақы төлеу бөлімінің бастығы Лариса Курочкина омырауына тақты.
Басқарма төрағасы Нұрахмет Нүриев төрт қызметкерге «Қазақмыс Холдинг» ЖШС Директорлар Кеңесі төрағасының Құрмет грамотасын табыс етті, екі адам «Қазақмыс Смэлтинг» ЖШС Басқарма Төрағасының Құрмет грамотасымен марапатталды.
Өндірістік қызметтегі жоғары еңбек жетістіктері, металлургия өндірісі кәсіпорындарының әлеуметтік-экономикалық дамуына қосқан зор үлесі үшін және металлург күнін кәсіби мерекелеуге байланысты Смэлтингтің Бас директоры Жәнібек Байғабелов бірқатар еңбеккерлерге «Қазақмыс Смэлтинг» ЖШС Құрмет грамоталарын табыс етті.
Сондай-ақ, мереке иелерін «КәсіпҚорған» кәсіподағы Балқаш филиалының төрағасы Бахтияр Сүлейменов, Ұлытау облысы «Қазақмыс» корпорациясы» ЖШС жанындағы ардагерлер кеңесінің Басқарма төрағасы, Жезқазған қаласының Құрметті азаматы Төлеген Бүкіров, Балқаш қаласының Құрметті азаматтары Марат Раджибаев пен Қамза Тынышбаев сала ардагерлері ретінде ізбасарларына құттықтауларын жеткізді.
Мереке кешке қарай «Жастар» аллеясында жалғасты. Биыл «Қазақмыс» металлург күніне орай балқаштықтар үшін үлкен мерекелік бағдарлама ұйымдастырды. Еліміздің және Ресейдің цирк өнерінде айрықша орны бар дарындылар балқаштықтарға керемет кеш сыйлады. Сайқымазақтар, акробаттар, жонглерлер, эквилибристер, сиқыршылар, ертегі кейіпкерлері ересектердің де көңілінен шыға білді. Керемет шоу бағдарлама «Қазақмыс» әнұранымен аяқталды, оны «Қазақмыс Смэлтинг» ЖШС БМЗ анод учаскесінің электрмонтері Әділжан Бейсембаев пен түсті металдарды құюшы Ерсұлтан Сәкенов орындады.
Одан әрі, Балқаштың түнгі аспанын әдемі, керемет отшашу безендірді. Бір сөзбен айтқанда, дәстүрлі мереке биыл да Балқашты дүбірге бөледі.
Ләззат СМАҒҰЛОВА.
Балқаш.
