Қабанбай батыр шағынауданының 200-ден астам оқушысы енді қала мектептеріне қатынап әуреге түспейтін болды. Өйткені аталмыш шағын ауданда 300 орындық заманауи мектептің құрылысы басталды.
Орайы келгенде айта кетейік, мемлекет басшысы Қасым-Жомарт Тоқаевтың тапсырмасы бойынша өңірлерде «Жайлы мектеп» Ұлттық жобасы қолға алынған болатын. Осынау ілкімді іс Ұлытау облысында өз жалғасын тапты. Шағын-
ауданда шаңырағын көтерген жаңа мектеп соның нәтижесі.
Биыл қолданысқа берілетін бұл мектеп 5 блоктан тұрады. Білім ошағында 25 орындық даярлық тобына да орын қарастырылған. Айналасында спорт, футбол, work out, іс-шаралар өткізуге арналған алаңдар орналасады. Білім ошағында жылу мәселесі де туындамайды. Себебі нысанға жеке модульді қазандық салынады.
Жуырда аймақ басшысы Берік Әбдіғалиұлы Қабанбай батыр шағынауданына арнайы барып, «Жайлы мектеп» құрылысымен жан-жақты танысты. Өңір басшысы жобаның тұрақты қадағалауда екенін жеткізіп, мерзімінен кешіктірмеуді тапсырды.
– Мектеп құрылысы тамыз айында аяқталуы қажет. Ішкі жабдығы мен сыртқы абаттандыру жұмыстары сапалы болсын, –деген тапсырмаларын да берді Берік Әбдіғалиұлы. Қазіргі уақытта құрылысшылар жеделдік үшін екі ауысымда жұмыс істеуге көшуді жоспарлап отыр.
Ізтай БЕЛГІБАЙҰЛЫ.
