Жезқазғанда Ұлытау облысы бойынша Қазақстан Республикасының Адам құқықтары жөніндегі өкілдігінің сараптама кеңесінің отырысы өтті. Кеңестің негізгі мақсаты – азаматтардың құқықтары мен бостандықтарының сақталуын қадағалап, кез-келген адам құқықтарының бұзылу мәселелерін шешуге көмектесу.
Күн тәртібіне екі мәселе шығарылды. Алғашқысы – қиын өмірлік жағдайға тап болған адамдарға қолдау көрсететін дағдарыс орталығының жұмысы туралы. Жезқазған мен Сәтбаев қаласында дағдарыс орталықтары жұмыс істеп тұр. Алайда, олардың қазіргі жай-күйі қандай? Пана іздеп барған аналарға онда жағдай жасалынған ба? Кеңесте осы мәселе басты назарға алынды. Айта кету керек, кеңес мүшелері, дағдарыс орталығына барып, жағдайларын бағамдаған.
– Орталыққа біз жоспар аясында бардық. Көрдік жағдайын. Жезқазған қаласындағы сын көтермейді. Осы жұмысты біз көтереміз. Ақша талапқа сай бөлінген. Бірақ жағдайы төмен, – деді ҚР Адам құқықтары жөніндегі ұлттық орталықтың Ұлытау облысы бойынша өкілі Аманжол Каримов.
Өңір үшін өзекті мәселенің тағы бірі – облыстың экологиялық жағдайы, халықты таза ауызсумен қамту және тұрмыстық газбен қамтамасыз ету. Бұл мәселелер де сарапатама кеңесінің мүшелерінің талқысына түсті. Әр бағыт бойынша ұсыныстар мен бастамалар айтылды.
Сондай-ақ оқыңыз
ҚР адам құқықтары жөніндегі ұлттық орталықтың Ұлытау облысы бойынша өкілі Аманжол Каримов бұл аталған проблемаларды шешу үшін тиісті министрліктерге Ұлттық орталық арқылы мәселе көтеріп шығатынын жеткізді.
Отырыс қорытындысы бойынша нақты ұсыныстар мен ұсынымдар әзірленіп, тиісті мемлекеттік органдарға жолданатын болды. Сараптама кеңесінің мүшелері өңірдегі жағдайды одан әрі бақылап, әлеуметтік және құқықтық мәселелердің тиімді шешілуіне алда да күш салатын болады.
Гүлім МАРАТҚЫЗЫ.
