Жезқазған өңірін өндірісте жүріп, спортпен әйгілеп жүрген зілтемірші аруымыз Айнұр Шәріпова Қырғызстанда өткен Азия чемпионатында төрт бірдей алтынды жеңіп келді.
Жезқазған кен байыту фабрикасында еңбек ететін Айнұр бұл жолы халықаралық пауэрлифтинг федерациясы ұйымдастырған WPC/AWPC нұсқасы бойынша үздік нәтижеге ие болды. Чемпионатқа 7 мемлекеттен 700-ден аса спортшы қатысқан.
– Бұл жарыста мен үш кезең бойынша жеңімпаз атанып, қатаң бицепске көтеру бойынша Азия көлемі бойынша жаңа рекорд орнаттым. Әрине, мұндай нәтижеге жету оңай болған жоқ. Бұл жолғы жеңісімді Жезқазған кен байыту фабрикасының 70 жылдығына арнаймын. Әрбір жарыс жолымда қолдау білдірген фабрика басшылығына, «КәсіпҚорған» кәсіподағына алғысымды айтамын. Осы жетістікпен тоқтап қалмай, әрі қарай да шыңдарды бағындыруды жоспарлап отырмын, – дейді зілтемірші ару.
Бағдат ҚАЗКЕНОВ.
