Жезқазған қаласында «Ұлттық киім – ұлт бейнесі» атты дәстүрлі және заманауи ұлттық киім үлгілерінің фестивалі өтті. Ауқымды мәдени шара қазақ халқының бай киім мәдениетін жаңғырту, оны заманауи сәнмен үндестіре отырып ұлт болмысының бейнесін насихаттауға бағытталды.
Фестиваль аясында ұлттық киімнің халқымыздың рухани-мәдени құндылықтарын айшықтап, дәстүр мен дінді үйлестіретін рөліне ерекше назар аударылды. Ұлттық киім – ұлттың өзіндік болмысы мен салт-санасын дәріптейтін символ ретінде, теріс діни ағымдардың ықпалына қарсы қоғамда иммунитет қалыптастыру құралы бола алатыны ерекше атап өтілді.
Салтанатты ашылу барысында ұлттық нақышпен безендірілген сахна мен киімдер көрмесі ұйымдастырылды, танымал отандық дизайнерлердің топтамалары жұрт назарына ұсынылды. Сонымен қатар, Халықаралық деңгейдегі Aida KaumeNOVA сән үйінің топтамасы көпшіліктің ерекше ықыласына ие болды.
Фестиваль бағдарламасы аясында заманауи үлгідегі ұлттық киімдердің дефилесі ұйымдастырылды, дизайнерлердің шығармашылығы мен шеберлігі таныстырылды. Мұнан бөлек, ұлттық өнер мен салт-дәстүрді ұлықтаған сахналық қойылымдар ұсынылды. Қолөнершілер жәрмеңкесі өтті.
Айта кетейік, фестивальде ұсынылған ұлттық киім топтамалары 2025 жылғы 18 сәуір күні Жезқазған қаласындағы «Плаза» сауда үйінде сатылымға шығарылды. Бұл – ұлттық киімнің күнделікті өмірге енуіне жасалған нақты қадам.
Бұл шараға Ұлытау облысының дін істері басқармасы ұйытқы болды. Ұлттық киім арқылы рухани және мәдени құндылықтарды жаңғырту, сондай-ақ теріс діни ағымдарға қарсы қоғамда иммунитет қалыптастыруды мақсат еткен фестиваль ұлттық болмысымызға сай киінудің үлгісін көрсетті.
