«Қазақмыс» корпорациясының өңірлердегі өндірістік нысандарын қорғауына алған «Қорғау қызметі» ЖШС Жезқазған филиалының күзетшісі Рүстем Әбдімбеков самбодан өткен жарыста қола жүлдемен оралды.
«Түркістан –түркі әлемінің туристік астанасы» атануы аясында спорт шеберелері арасында самбо күресінен Түркістан қаласының Құрметті азаматы, Қазақстан Республикасының спорт шебері Ерқанат Тәңірбергеновті еске алуға арналған Қазақстан Республикасының чемпионатында бабын сынға салған Рүстем Ермекбайұлы қазақша және самбо күресімен 1994 жылдан бері шұғылданып келеді. Ол аталған спорт түрлерінен спорт шеберлігін 1999 жылы алған. Түркістандағы бұл жеңіске дейін Рүстем Әбдімбеков бірнеше чемпионаттарда жеңімпаз атанды.
– Қасиетті Түркістан жерінде өткен чемпионатта 40 – 44 жас аралығындағы спорт шеберлерімен 64 келі салмақ дәрежесінде күш сынастым. Еліміздің әр аймағынан бас қосқан чемпионаттан қола жүлдеге қол жеткізіп қайттым. Бұл спорт түрімен тұрақты түрде айналысып келемін. Біздің жұмыста шымырлық, деннің саулығы басты назарда болғандықтан үнемі жаттығамын. Самбо және қазақша күрестен Қазақстанның бірнеше дүркін чемпионы болдым, – дейді Рүстем Ермекбайұлы.
Ұлытау облысының намысын ту етіп көтеріп қайтқан әріптестерін «Қорғау қызметі» ЖШС Жезқазған филиалының басшылығы мен «КәсіпҚорған» кәсіподағы комитеті қарсы алып, жеңісімен құттықтады.
Рүстем Ермекбайұлы «КәсіпҚорған» кәсіподағының белсенді мүшесі. Ұйымның ұйымдастыратын спорттық шараларына үнемі қатысып тұрады.
Бағдат ҚАЗКЕНОВ.
