«Қазақмыс» басшылығы Сәтбаевтағы кеншілердің арыз-талаптарын тыңдап, олармен келісімге келді, – деп хабарлайды «Қазақмыс» корпорациясы» жауапкершілігі шектеулі серіктестігінің баспасөз қызметі.
«Қазақмыс» басшылығы жұмыстарды тоқтата тұру туралы жариялаған мердігер ұйымдардың жұмысшылары мен кеншілер қойған мәселелерді шешу үшін шахтаға түсті. Кездесу нәтижесінде тараптар келісімге келді. Жұмысшылар мәселелерінің бір бөлігі сол жерде келісіліп, қанағаттандырылды. Көтерілген мәселелердің екінші бөлігін орындау – заңнамалық өзгерістерге қатысты, осыған байланысты оны шешуге қосымша уақыт қажет. Оларды жұмысшылар мен жұмыс берушілердің өкілдерінен тұратын арнайы құрылған бастамашыл топ пысықтайтын болады», – делінген түсініктемеде.
Орайы келгенде айта кетейік, 2023 жылғы 14 тамызда түнгі ауысымға түскен Сәтбаев өндірістік алаңындағы № 65 шахтасының кеншілері мен мердігерлік ұйымдарының қызметкерлері жұмысты тоқтатқанын хабарлады. Мән-жайды білу-анықтау мақсатында «Қазақмыс» басшылығы, прокуратура және жергілікті атқарушы билік өкілдері оқиға орнына барды. «Қазақмыс» корпорациясы» ЖШС басшылығы туындаған мәселелерді шешу үшін кеншілердің бастамашыл тобымен келіссөздер жүргізді. Бастамашыл топ компания басшыларының атына 15 пункттен тұратын өздерінің талаптарын жолдаған болатын.
«Қазақмыс» корпорациясы» ЖШС баспасөз қызметі таратқан ақпаратқа қарағанда, келіссөздер қорытындысы бойынша кәсіпорында жұмыс жалғасын тапқан. Ал, ереуілге шыққандардың ешқандай жауапкершілікке тартылмайтыны айтылған.
Сондай-ақ оқыңыз
Ізтай БЕЛГІБАЙҰЛЫ.
