Жаңаарқа ауданының тұрғыны Ғалия Отарбаева «Ауыл аманаты» ұлттық жобасының 2024 жылғы үздік қатысушысы атанды. Ол осы жобаның Қызылорда облысында өткен қорытынды жиынында ҚР Премьер-министрінің орынбасары Тамара Дүйсенованың қолынан «Үздік сүт өнімі» номинациясының жеңімпазы дипломын алып, мерейге бөленді.
Үкіметтің «Ауыл аманаты» бағдарламасы кәсіпке бет бұрып, шаруасын дөңгелетем деген ауыл тұрғындарына аса қолайлы болуда. Мәселен, жоба іске қосылғаннан бері 16 мыңға жуық ауыл тұрғыны жеке кәсібін бастау үшін 2,5 % жеңілдікпен шағын несие алған. Сонымен қатар бұл 17 мыңдай жұмыс орнын құруға мүмкіндік беріпті. Ғалия да осы жобаның игілігіне қол жеткізіп отырған ауыл тұрғындарының бірі.
Жаңаарқа ауданының Бидайық ауылында тұратын ол өткен жылы осы бағдарлама бойынша құжаттарын рәсімдеп, үйін кепілдікке қойып 2,5 пайызбен 9,2 млн. теңге несие алған болатын. Осы қаржыға 30 бас құнажын сиыр, 10 тонна шөп сатып алып кәсібінің аясын кеңейте түсті. Сиырларын бұзаулатып, жаз бойы сауынмен айналысты. Сүтті көпшілік қолды өнімге айналдыра білді. Айран, қаймақ, сарымай, ақ ірімшік, сары ірімшік, кепкен құрт, сүзбе, сыр өнімдерін жасап, пайдасын көрді.
Ауылда туып-өскен Ғалия Амантайқызы мал шаруашылығы кәсібімен бұған дейін де айналысып келген еді. Ол есеп-кредиттік техникумды бітірген соң Қарағанды қаласындағы банкілердің бірінде екі жылдай экономист болып еңбек жолын бастағанымен, көңілі ауылға оралуды қалады.
Сөйтіп, 1994 жылы туған ауылы «Ақтау» кеңшарының Райс бөлімшесіндегі ата-енесінің қолына отбасымен көшіп келді. Осы кезеңде ауыл шаруашылығындағы жаппай жекешелендіру науқанына бетбұрыс басталған болатын.
Сондай-ақ оқыңыз
Нарықтық қатынас көшіне ілесіп бұлар да отбасылық жеке шаруашылық құрды. Шаруа қожалығының ісіне біраз ысылған кездерінде аудан орталығына жақын жерде орналасқан Бидайық ауылына қоныс аударды. Ғалия 1998 жылдан бастап сауған сүтінен өндірген қаймақ, май, ірімшік сияқты өнімдерін қалаға апарып сатумен айналысты. Кәсібінің аясын кеңейтуді көздеп 2000 жылы ауыл тұсынан өтетін Қызылорда – Павлодар автожолының бойынан үй салып, сол жерден сүт өнімдерін сатуды жолға қоя бастады. «Бірлескен істе береке бар» демекші, жолдасы Сәрсенбектің ауыл шаруашылығы саласының маманы болуы да көп көмегін тигізді.
Бүгінде кәсібін нәсібіне айналдырған кәсіпкер Ғалия Отарбаеваның сүт өнімдері аудан тұрғындарымен қатар, олай-бұлай өткен жолаушыларға да жақсы таныс. Сапалы табиғи өнімдерді қолайлы көретін адамдар оның құтты мекеніне жиі соғып тұрады. Адал еңбегінің игілігін көріп отырған еңбекқор ана енді «Ауыл аманаты» бағдарламасының арқасында шаруашылығын одан әрі дамыта түсетін болды.
Амандық РАХҰЛЫ.
