Облыс аумағында жеке қаржысына көпқабатты тұрғын үй құрылысын жүргізіп жатқан компаниялардың бірі үлескерлерден алдын ала ақша алып алған. Құрылыс аяқталған соң, баспана шаршы метрі бағасының қымбаттайтынын алға тартып, қазірден жарнамалап, салымшылар қаражатын заңсыз тартуды жүзеге асырғандар ісі – ҚР «Тұрғын үй құрылысына үлестік қатысу туралы» заңымен қаралмақ.
Жезқазған қаласының әкімшілік құқық бұзушылық жөніндегі мамандандырылған сотының қаулысымен аталған компанияға 1 035 000 теңге көлемінде айыппұл салынды. Айта кетейік, Бүгінде өңірімізде жеке меншік қаржыға салынып және салынуы көзделіп отырған 14 көп қабатты тұрғын үй құрылысы тіркелген.
– Салымшылардың ақшасын тартудың 3 тәсілі бар. Оның бірі – бірыңғай оператордан кепілдік алу. Екіншісі – екінші деңгейдегі банктің жобаға қатысуы. Үшіншісі – көппәтерлі тұрғын үйдің қаңқасы тұрғызылғаннан кейін үлескерлердің ақшасын тарту. Осы үшеуінің бір тәсілі орындалмаса үлескерлерден ақша алуға рұқсат жоқ. Осыған орай облыс тұрғындарына жарнамаға қызығушылық танытқан болсаңыз, алдымен уәкілетті органдарға, оның ішінде Ұлытау облысының мемлекеттік сәулет-құрылыс бақылау басқармасы мемлекеттік мекемесіне хабарласуыңызды сұраймыз, – дейді Ұлытау облысының мемлекеттік сәулет-құрылыс бақылау басқармасының басшысы Талғат Әлменов.
Гүлім МАРАТҚЫЗЫ.
