Қаламызда «Жезқазғанның 70 жылдығына – 70 тарту» бастамасы өріс алуда. Осыған орай көптеген игі жобаларды жүзеге асыру көзделіп, мерейтойға арналған алғашқы тарту-таралғылар да жасала бастады. Осы аптада «Хан ордасы» қонақүй кешенінің салтанатты ашылуы соның айқын көрінісі болды.
Жаңа кешеннің ашылу салтанатына облыс әкімі Берік Әбдіғалиұлы, облыстық мәслихаттың хатшысы Бауыржан Шыңғысов қатысып, құттықтау тілектерін айтты. Облыс әкімі өз сөзінде Ұлытау өңірінде туризмді дамытуға байланысты осындай жайлы қонақүйлер әлі де керек екеніне назар аударып, жақсы іске жаршы болған кәсіпкер Марғұлан Есболұлына ризашылығын білдірді.
Қонақүй кешені жобасын кәсіпкер Марғұлан Молдашев «Ұлытау» әлеуметтік кәсіпкерлік корпорациясымен бірлесіп жүзеге асырды. Жобаның жалпы құны 600 млн. теңгедей. Оның 256 млн. теңгесін «Ұлытау» ӘКК қаржыландырса, қалғаны кәсіпкердің өз қаржысы. Төрт қабатты ғимараттың құрылыс жұмыстарын екі жарым жылдың ішінде «Кристалл Групп» ЖШС ойдағыдай атқарып шықты. Шағын кешеннің іші «Хан ордасы» деген атауына сай этно-стиль үлгісімен безендіріліп жабдықталған. Қонақ үйде 40 адамға арналған 20 нөмірі бар. Ондағы стандартты, жартылай люкс және люкс бөлмелерінде қонақтардың жайлы демалуына қажетті жағдайлар жасалған. Байланыс жүйелерімен қамтылған. Іскерлік шаралар өткізуге арналған конференция залы, тамақтанатын мейрамханасы да қонақтарға қолайлы болары сөзсіз. Лифт жұмыс істейді.
Ашылу салтанатына қатысқан қала жұртшылығының өкілдері мен ардагерлер кәсіпкердің бастаған ісінің жемісті болуына тілектестігін білдіріп, батасын берді.
Амандық РАХҰЛЫ.