«Қазақмыстың» футболшылары тау-кен металлургия кешені командалары арасында шағын футболдан өткен бірінші республикалық турнирдің жеңімпазы атанды. Жарыс Алатау бөктеріндегі алып шаһар – Алматыда өтті.
Аталмыш жарысқа «Қазақмыс» атынан футболдан ұжымдар арасында өткен турнирдің чемпиондары «Қазақмыс» корпорациясы» ЖШС Цифрландыру қызметінің құрама командасы қатысты. Олар қызықты да тартысты ойын көрсетіп, «Алтын алмас» пен «Полиметалл» командаларын жеңіп, бірде-бір жеңіліссіз ақтық мәреге шықты. Ақтық мәреде ойыншылар тағы да «Полиметалл» командасымен кездесті. Тартысты бәсекеде «қазақмыстықтар» 5:2 есебімен жеңіске жетті.
Цифрландыру қызметі командасы «Шахтер кубогынан» бөлек, «Үздік қақпашы» номинациясын да жеңіп алды. Оған команданың қақпашысы, электромонтер Айбек Сағынтай ие болды. Сонымен қатар, командаға 1 млн. теңге көлемінде қаржылай сыйақы табысталды. Жарыстың бас төрешісі ретінде FIFA аккредиттеген төрешісі Александр Кулаков «Қазақмыс» ойыншыларының жоғары дайындық деңгейін атап өтіп, оларды жеңісімен құттықтады.
Айта кетейік, ақтық ойында қарсыластар қақпасына Шәріп Худашев – 3 доп, Ерасыл Сәдуақасов – 1 доп, Темірхан Сүлейменов – 1 доп соғып, ерекше көзге түсті.
Жеңіс туын желбіретіп қайтқан ІТ қызметінің құрама командасын апта басында әріптестері, «Қазақмыс» корпорациясы» ЖШС Жезқазғантүстімет ӨБ мен «КәсіпҚорған» кәсіподағы Жезқазған филиалының өкілдері мен жергілікті БАҚ қарсы алды.
– «IT Kazakhmys» командасы 2009-2010 жылы құрылды. Құрамында 12 ойыншы бар. Бұл біздің республикалық деңгейдегі бірінші турниріміз. Барлығы жоғары деңгейде өтті, әр қаладан жиналған командалармен алаңға шығып ойнаған қызықты болды.
Алаңға 4 мәрте шығып ойнадық. Финалдық ойында 5:2 нәтижесімен жеңіске жеттік. Аталмыш жарысқа жолдаманы жергілікті футбол командаларының арасында өткен турнирде үздік ойын көрсетіп, жеңімпаз атанып ұтып алған болатынбыз.
Біздің команда бұған дейін «Қазақмыс» корпорациясы, «КәсіпҚорған», «Jastar Bolashaq» Жастар одағы ұйымдастырған барлық турнирларға қатысып, үздіктер сапынан көрініп келеді.
Алматы қаласында өткен жарысқа демеушілік көрсеткен «Қазақмыс» корпорациясы басшылығына, ұйымдастырушылар «КәсіпҚорған» кәсіподағына алғысымыз шексіз, – дейді команда капитаны Марлен Ералиев.
Мыс алыбы «Қазақмыс» компаниясының ала доп бәсекесінде намысын қорғап, жеңіспен оралған «IT Kazakhmys» командасы әлі талай топ жарып шығарына сенім мол.
Бағдат ҚАЗКЕНОВ.
