Ел егемендігінің құнды құжаты – Тәуелсіздік туралы декларация қабылданған 25 қазан – Республика күнінде өндірісті өркендетуге үлес қосқан «Қазақмыс» корпорациясының 43 еңбеккері «Еңбек ардагері» медаліне, «Құрметті кенші», «Құрметті металлург» және І, ІІ, ІІІ дәрежелі «Кенші даңқы», І, ІІ, ІІІ дәрежелі «Еңбек даңқы» төсбелгілеріне ие болды.
«Қазақмыс» корпорациясы» ЖШС Басқарма төрағасы Нұрахмет Нуриев бірқатар озаттарға медальдар мен төсбелгілерді салтанатты жағдайда табыс етті.
– Республика күні – еліміз үшін, оның ішінде «Қазақмыс» корпорациясының жұмыскерлері үшін маңызды мереке. Мемлекет басшысы алда келе жатқан жылды «Жұмысшы мамандықтар жылы» деп жариялады және мереке қарсаңында біздің 43 жұмыскер салалық марапатқа ие болды. Құрметті әріптестер! Сіздердің өңірімізді өркендетуге, елімізді дамытуға жұмсап жатқан ерік-жігерлеріңіз бен адал еңбектеріңіз өзгелерге үлгі әрі өнеге, – деді Нұрахмет Нуриев.
Басқарма төрағасы марапат иелері ерекше құрметке лайық екеніне тоқталып, бұл ел Президенті атап өткен кәсіпқойлық пен адалдықтың шынайы бағасы екенін айтты.
Сондай-ақ оқыңыз
– «Қазақмыс» елмен бірге дами берсін. Біздің қызметіміз кәсіпорындарымыз шоғырланған өңірлерді өркендетуге қосымша серпін берсін. Қазақстандағы ең ірі жұмыс беруші және салық төлеуші бола берейік. «Қазақмыс» әрқашан лайықты бағаланып, марапаттала берсін, –деп қорытындылады Нұрахмет Нуриев өз сөзін.
Бағдат ҚАЗКЕНОВ.
