Соңғы жылдары Жезқазған қаласының күні 8 қыркүйекте атап өтілуде. Негізі Жезқазған қаласы Қазақ ССР Жоғарғы Кеңесінің Жарлығымен 1954 жылдың 20 желтоқсанында құрылғаны баршаға аян. «Қала күнін күн жылыда тойлаған дұрыс» деген пікірлер де бар екенін естіп жүрміз. Кейбіреулер «Қала күнін ауыстыруға негіз болған 8 қырқүйек – қаланың бұған дейін үстем болып келген «Джезказган» атауындағы «Д» әріпінен құтылған күн» дейді. Не керек, айтылатын уәж көп.
1991 жылдың көктемінде Жезқазған қаласының сол кездегі басшысы Мұханбет Көпеевке қала билігінің басында жүрген бір топ ағаларымыздың Наурыз мейрамын мамыр айының аяғында тойлауды ұсынғандарын да көзіміз көріп, құлағымыз естіген болатын. Алайда Мұханбет Жұманазарұлының тегеурінділігінің арқасында Наурыз мейрамын қаламызда өз уақытында тойлауға қол жетті. Қала күнінің атап өтілуі соңғы жылдары қыркүйек айына ауыстырылғанын немерелеріме түсіндіре алмай келемін. Менің түсінігімде тарихи датадан ауытқымау керек. Жезқазған қаласының күні 20 желтоқсанда аталғаны дұрыс деп есептеймін.
Қала күні қарсаңында мекемелер, кәсіпорындар мен шағынаудандар арасында конкурстар ұйымдастырылып, нәтижесін шығарып, жеңімпаздарды марапаттаса, білім, өнер, спортта жетістікке жеткендерді салтанатты түрде атап өтсе. Жезқазған қаласының Құрметті азаматы атағы берілгендерді марапаттау рәсімі жасалса дұрыс болар еді.
Қала күніне арналған салтанатты жиында соңғы жылда атқарылған жұмыстарды қортындылап, алдағы уақыттағы қаламыздың даму жоспары туралы баяндалса, қаланың өркендеуіне үлес қосқан азаматтарды марапаттаса орынды болады дер едім.
Төлеген БҮКІРОВ,
Жезқазған қаласының Құрметті азаматы.
