Біз – ардагерлер үшін мектептерде болып оқушы жас жеткіншектермен кездесу, олармен сұхбаттасып, ой бөлісіп, әңгіме-дүкен құру, олардың көзінен өзіңе деген қызығушылықты көру бір ғанибет екен.
Сондай кезекті кездесудің бірі жақында Сәтбаев қаласындағы Ы. Алтынсарин атындағы мектеп-лицейде өтті. «Өнегелі өмір» жобасы аясында бейнетінің зейнетін көріп отырған қос ардагер Қорабай Рамазанов пен Абай Бекішов осы кездесудің қонақтары болды. Кездесуді тарих пәнінің мұғалімі А. Ж. Жекенова жүргізді.
«Қазақмыс» корпорациясының еңбек ардагерлері қос ақсақал әуелі өздерінің еңбек жолдары жайлы оқушылармен естелік бөлісті. Ардагерлер жастардың қоғамдағы орны туралы ортаға салиқалы ой салды. «Жастар – қоғамның қозғаушы күші. Сендер еліміздің ірге тасын қалайтын болашағымызсыңдар. Бойларыңда жалын атқан серпіліс бар, асау аттай алға ұмтылып тұрсыңдар, осындай кездеріңде біз сияқты өмір көрген ағаларың сендерді дұрыс жолға жетелеп бағыт-бағдар беруіміз керек. Отан сүйгіш болып өсулерің керек, сапалы білім алып өңіріміздің өркендеуіне атсалысуларың қажет», – десті ардагерлер.
Президентіміз Қ. Тоқаев: «Егер әрқайсыңыз алдарыңа қойған мақсатқа қол жеткізіп, өз қабілеттеріңізді арттырсаңыздар, мемлекет те табысты болады. Ол үшін үнемі еңбектену керек, ең алдымен өз-өзіңді дамытуың қажет», – деген болатын. Сондықтан жастарымыз қазіргі өмір талабына сай рухани біліммен нәрленіп, ұлттық құндылықтармен тәрбиеленуі керек. Озық ғылыммен сусындаған еңсесі биік ұрпақ жетілдіру кезек күттірмейтін өмір талабы.
Сондай-ақ оқыңыз
Бұдан кейін ардагерлер биыл Сәтбаев қаласының 50 жылдығына орай қаламызда ашылатын мұражай туралы әңгімеледі. Озық тұлға болып қалыптасу үшін әр адам кітап оқу керек екендігін баяндай келіп ардагерлер мектептің «буккросинг» бұрышына М. Сейтқазиновтың «Дәридай-жүрек», Т. Бүкіровтың «Құрыш тұлға» атты кітаптарын сыйға тартты.
Кездесу соңында мектептің домбыра үйірмесі ардагерлер құрметіне Құрманғазының «Балбырауын» күйін орындап берді.
Жәми Тұрсынбаев,
«Қазақмыс» корпорациясы» ЖШС жанындағы
Ардагерлер кеңесінің мүшесі.
