Естеріңізде болса керек, осыдан екі жыл бұрын, яғни 2023 жылы елімізде бес бірдей бөбек 20 миллионыншы тұрғыны болып тіркелді. Соның бірі біздің біздің өңірімізде өмірге келген кішкентай Томирис Сұңғатқызы болатын.
Енді мына қызыққа қараңыз. 20 миллионыншы тұрғынның әкесі Сұңғат осы қызын 20 жасында сүйіпті, бұл отбасының өңірдегі коды да 20 саны екен. Бұл сәйкестік пе, әлде тағдырдың сыйы ма дерсіз.
Міне осы Томирис қыз биыл 2 жасқа толып отыр. Корпорация басшылары Томиристі «Қазақмыстың» қызы» деп те атайды. Оған негіз жоқ емес. Кішкентай ханшайымның әкесі де, атасы да осы «Қазақмыс» корпорациясына қарасты құрылымдарда еңбек етеді.
– Немеремнің алғашқы тілі «ата» деп шықты. Төбем көкке жеткендей болып жүрмін. «Атасының баласы», деп үйдегілер де оған ерекше қарайды, – дейді Томиристің атасы Ақылбек Әбдірахманов.
Ахаң 20 жылдан астам № 55 шахтада бұрғылаушы болып еңбек етіп келеді. ІІІ дәрежелі «Еңбек Даңқы» төсбелгісінің иегері.
– Осыдан екі жыл бұрын тұңғышымыз, атасының қызы дүниеге келді. Салмағы 3 келі, бойы 49 сантиметр ғана кішкентай шақалақ еді. Біз оның атағы дардай болатынын ол кезде білмедік те. Тек Ұлытау облысы әкімдігінен «20 миллионыншы тұрғын» деген хабар келгенде барып бірақ білдік.
Кейін Мемлекет басшысы Қасым-Жомарт Тоқаевтан құттықтау келді. Қолымызға «Қазақстанның 20 миллионыншы тұрғыны» деген куәлік берілді. «Қазақмыс» корпорациясы 1 миллион теңгенің сертификатын тапсырды. Сол Томирисіміз биыл Құдай қаласа екінші рет 8 наурыз мерекесін қарсы алады, – дейді Томиристің анасы Айгерім Молдашева.
Ізтай БЕЛГІБАЙ.
