Жезқазған жылу, электр орталығынан таратылатын жылуды шашау шығармай шаһарға жеткізуде «Жезқазған жылумен, сумен жабдықтау кәсіпорны» ЖШС-ның орны бөлек. Әсіресе, кәсіпорын құрамындағы энергоқызметі цехы энергетиктерінің қыстың көзі қырауда мысты қаланы жылумен қамтудағы еңбегі сүбелі.
Елімізде жыл соңында аталып өтілетін энергетика саласы қызметкерлерінің мерекесіне орай біз осы цехқа арнайы атбасын бұрған болатынбыз.
Денис Гималетдинов басшылық жасайтын бұл цехтың ұжымы шағын болғанымен атқарар қызметі ауқымды. Цехта 9 адам еңбек етуде. 8 сорғы құрылғысы тұрақты жұмыс істеп тұр.
– Біздің басты міндетіміз – жылу маусымы кезінде жылуды қалаға жеткізу. Қазіргі таңда сегіз сорғы қалаға күндіз-түні жылу беріп тұр. Қондырғылардың уақытылы жұмыс істеуіне баса мән береміз. Цехта алты электр-слесарь, екі бақылау-өлшеу аспаптары және автоматика маманы бар. Жұмысымызды жүйелі атқару арқылы қаланы қыс мезгілінде жылумен қамтуда ұжымдағы мамандар өздерінің кәсібилігін көрсете білуде. Аға буынның қатарында Андрей Борисовтің тәжірибесі жастарға үлгі. Цехтағы сорғы қондырғылары жаз мезгілінде жөндеу жұмыстарынан өтіп, жылу беруге дайындалады, – деді Денис Ринатович. Энергоқызметі цехы маңызды нысан ретінде өзінің жұмысын әр маусымда жүйелі атқарып келеді.
Сондай-ақ оқыңыз
Суретте (солдан-оңға қарай): цех еңбеккерлері Игорь Бондаренко, Мадияр Есимхан, Любовь Давыдова, Бибарыс Орынбеков, Денис Гималетдинов және Айтжан Ақшолақов.
Бағдат ҚАЗКЕНОВ.
