Небір қаламгерлер қанаттанған қасиетті Ұлытау өңірі қазір де жақсы ақын, еңбекқор жазушы, жүйрік журналистерден кенде емес. Ал оларға жасалар қолдау, артылар сенім, көрсетілер құрмет болып жатса, нұр үстіне нұр. Міне, осындай бір игілікті іс күні кеше жүзеге асып, әдебиет сүйер қауымды бір қуантып тастады.
Ел ордасы Астана қаласынан Ұлытау облысының төрт бірдей қаламгері – Мұқаш Сейтқазинов, Сара Смағұл, Төлеш Асанов, Ернұр Сейдахмет Қазақстан Жазушылар одағының мүшелігіне қабылданғаны жайлы сүйіншілеген хабар келіп жетті.
Есімдері аталған қаламгерлердің қай-қайсы болса да қазақ әдебиетіне қомақты үлес қосып отырған жазушылар, ақындар. Өзінің қалам тербеуімен, құрастыруымен, редакторлық етуімен бірнеше кітаптар шығарып, өз оқырмандарын қалыптастырған авторлар. Қаламгерлер туындыларының тақырыптары да әр алуан болып келеді. Оларда туған жер тарихы, өскен ел шежіресі, ел үшін еткен еңбек, ауылдың адамдары, өнер мен өмір қара сөзбен де дестеленіп, өлең сөзбен де кестеленеді. Оның бәрі-бәрінің үлкен-кіші оқырманның қай-қайсысына ой да салары, өнеге де болары қуантады.
«Жақсы десе жан сүйінеді» демекші, жерлестеріміздің алыптар шоғыры ат шалдырған сөз зергерлері қосынына қосылып, іргелі ұйымның мүшесі болғаны жас облысымыз үшін де үлкен мерей.
Ізтай БЕЛГІБАЙҰЛЫ.