Түсті металлургияның қарашаңырағы ретінде қастерлейтін Қарсақбай қалашығы өндірісте ғана емес өнер мен спортта да аты шыққан дарабоздарды дүниеге әкелген қасиетті мекен.
Спорттық додаларда бағы жанып, республикалық, халықаралық жарыстарда топ жарған азаматтар бұл өлкеде де баршылық. Соңғы жылдары елімізде бұқаралық спортқа қалыптасқан оң көзқарастың нәтижесінде ауылдар мен шағын қалашықтарда да спорт үйірмелерінің жұмысы жанданды. Міне, мұндай игі шаралар Қарсақбай кентінде де жүзеге асып келеді.
Қалашықтағы спортқа құмар жастар мен жасөспірімдерді боксқа баулып жүрген СерікМәшіріптің салауатты өмір салтын насихаттаудағы еңбегі ұшан-теңіз. Серік Қапанұлы денешынықтыру пәнінен сабақ бере жүріп, бүгінде республикалық деңгейде өнер көрсетуге қабілетті жастарды баптауда. Оның шәкірттері жақындаНұр-Сұлтан, Алматы қалаларында өткен республикалық жарыста топ жарды. Жасөспірімдер арасында өткен бәсекеде СерікҚапанұлы тәрбиелеген жас боксшылар жүлдемен оралды. Бұған дейін де бокстан спорт шеберлігіне үміткерлерді баптаған Серік Мәшіріп ендігі үмітті жас буыннан күтетіндігін алға тартады.
– Бапкер ретінде 2008 жылдан бері балаларды боксқа баули бастадым. 7-8 жастағы балалар өз ынталарымен келеді. Осы 14 жыл ішінде шәкірттерімнің сенімді ақтамағандары болмады. Қазіргі таңда боксты серік етіп жүрген жасөспірімдерден Бекнұр Берік, Батырлан Базылхан, Асқар Жомартұлы, Мұхамедәли Тілеуберген, Темірлан Базылхан, Нұрбол Жұмағали сынды шәкірттерім өз салмақ дәрежелерінде намысты қолдан бермей жүр, – дейді Серік Қапанұлы.
Серік Қапанұлы осыған дейін кенттегі агротехникалық колледж бен №15 тірек мектебінің спорт залында балаларды жаттықтырып келсе, енді шәкірттерін жақында ашылған «Қарсақбай» спорт кешенінде шынықтыруда. Кентте ашылған бұл кешен жас спортшылар үшін зор қуаныш болды. Ендігі жерде бұл спорт кешенінен әлем чемпионы шығатынына сенім мол.
Бағдат АЙТӨРЕҰЛЫ.
