Қарағанды өндіріс алаңындағы ірі кен орны «Нұрқазған» кенішінің жұмысшыларының қолайлы жағдайда жұмыс жасауы үшін корпорация қолдау танытып келеді.
Кеніштің әкімшілік-тұрмыстық ғимаратының шағын болуына байланысты мұнда жұмысшылардың киім ауыстыратын бөлмелері, жуынатын жерлері аядай ғана болатын. Осы мәселені алға тарта отырып, кеніш директоры Мұқан Үңгітбаев жаңа 300 орындық ғимаратты салуға бекінген болатын. Ойға алған шаруа оңымен жүзеге асып, наурыз айында жұмысшыларға бөлек орын берілді. «Нұрқазғанға» кезекті сапарымда «КәсіпҚорған» кәсіподағы комитетінің төрағасы Айбын Арынғазинов ғимараттың жай-күйімен таныстырды.
Еңбеккерлердің жуынатын кабинкаларынан бастап, медициналық тексеруден өтетін бекет, шам беру бөлімі жаңаша кейіпке енген. Арнайы кептіру орны да қарастырылған.
Кеніштің шағын ғимаратында орналасқан аталмыш бөлім қызметтері енді жеке орында көрсетіледі. Осыған дейін тарлық етіп келген ғимараттың мәселесі оң шешімін тапты. Енді шам беру бөліміне кәсіподақ тарапынан желдеткіш алып беруді көздеп отырмыз. Ғимараттың айналасы абаттандырылатын болады, – дейді Айбын Сәтбекұлы.
Шам беруші Светлана Байбатшаевамен тілдескенімізде: – Бір мезетте үш жүз жұмысшыға қызмет көрсететін ғимараттың кеңдігі жұмыс істеумізге ешқандай кедергі келтірмейді. Көптен бері қозғалып келген мәселенің оң шешімін табуына ұйытқы болған кеніш басшылығына, кәсіподаққа көпшілік алғысын арнауда, – деді.
Еңбек өнімділігін арттыру әуелі жұмысшының әлеуметтік мәселесін шешумен тікелей байланысты. Сондықтан «Нұрқазған» кенішінің жұмысшылары үшін тағы бір игілікті іс тың серпін беретіні хақ.
Бағдат ҚАЗКЕНОВ.
