«Жезқазғансервис» кәсіпорнының № 57 шахтадағы сервистік телімінің жабдықтарға қызмет көрсету жөніндегі электрслесарі болып еңбек етіп жүрген Андрей Демичев – өзінің кәсібилігімен ұжымында беделге ие болған маман.
Ол 1991 жылы Жамбыл химиямеханикалық техникумында «Өндірістік кәсіпорындар мен қондырғылардың электр жабдықтары» мамандығы бойынша білім алды. Оның электрик-техник ретіндегі біліктілігі жоғары. Әскери қызметін өтеп, 1997 жылы осы салада 3 разрядты жерасты электрслесарі ретінде еңбек жолын бастады.Осы жылдар ішінде ол өз кәсібінің шебері атанып, электр жабдықтарындағы күрделі ақауларды шеберлікпен жөндей отырып, жоғары деңгейдегі маманға айналды. 30 жылдан астам уақыт бойы электрслесарь ретінде жұмыс істеп, мол тәжірибе жинақтады.Ол үнемі өзінің кәсібилігін дәлелдеп келеді.
– Біздің телімнің негізгі атқаратын жұмысы жер асты техникаларын жөндеу және соларға қызмет көрсету болып табылады. Электрслесарьлар бригадасы техникалардың сақадай сай болуына әрқашан дайын. Ұжымымыз жүктелген міндетті уақытылы еңсеріп келеді, – дейді Андрей Владимирович.
Андрей Владимирович жұмысшы мамандығын көбірек насихаттап, жастарды өндіріске тарту керек деп санайды. – Биылғы жылды Президент «Жұмысшы мамандықтар жылы» деп жариялады. Бұл өте орынды. Қазір жұмысшы мамандығының беделін асырып, қарапайым еңбек адамының мәртебесін өсіруге баса көңіл бөлген жөн. Жастарды жұмысшы мамандығына икемдеу –қазіргі заман талабы, – деп сөзін түйіндеді.
Сондай-ақ оқыңыз
Андрей Демичев ұжымында білікті маман болса, отбасында асқар тау әке, немерелерінің қамқоршысы. Бос уақытында кітап оқып, демалыс күндерін отбасымен табиғат аясында өткізгенді қалайды, әсіресе Жезді кентіндегі бұлақтардың маңында тынығуды дағдыға айналдырған.
Бағдат ҚАЗКЕНОВ.
