«Қазақмыс» корпорациясының өңірлердегі кен тасымалдау жұмысын атқарып отырған «Транко» АҚ құрамындағы «Транко Жез» ЖШС бірнеше құрылымнан тұрады. Солардың қатарында электрмен қамтамасыз ету бөлімінің шаруашылығы айрықша орын алады.
Қайрат Түлкібаевтың басшылығындағы бөлімде электрмонтерлердің қызметі сұранысқа ие. Жүйткіген электровоздардың межелі жерге уақытында жетуіне жауапты бірден-бір мамандық иелерінің тынымсыз еңбегі арқасында кен байытылып, сары мыс алынуда.
Бөлімдегі электрмонтерлердің бірі – Бақытбек Әлімбаев. Оның бұл салаға келгеніне биыл он жыл толыпты. Алғашқы еңбек жолын Жезқазған байыту фабрикасында бастаған ол мұнда 3-разрядты маман болып келген. Электровоз машинасының тоқтарын қалыпқа келтіріп, реттеудің жай-жапсарын Николай Парковтан үйренген. Тәжірибелі маман бүгінде өзінен кейінгі жастарға білгенімен бөлісіп, жол көрсетіп келеді.
Электрмен қамту бөліміне осыдан 5 жыл бұрын келген Мейрамбек Еламанның еңбек жолы мемлекеттік қызмет саласында басталған. Алғабас ауылдық әкімдігінде бір жарым жылдай жұмыс істеген ол Ақыл Бөлегеннің тәлімінде шыңдалып, қазір осы бөлімдегі білікті электрмонтер атанды.
«Казатомөнеркәсіп» ҰАК» АҚ компаниясында 10 жыл еңбек еткен Рахат Абдуллаевтың бұл салаға келгеніне – 4 жыл. Рахат та шыңдалу мектебінен өтті. Оның тәлімгері Нұрдәулет Қанафин болды.
Ұжымдағы аға буынның ісін жалғастырып жүрген Төремұрат Нұрсейіттің Жезқазған мыс қорыту зауытының жылу, энергетика бөлімінен осында келгеніне 6 айдан асыпты. Мейрамбек Еламанның талапкері еңбекқорлығымен көзге түсіп жүр.
Еңбегі ерен электрмонтерлердің арқасында «Транко Жез» ЖШС кен тасымалдау қызметінде оң нәтижеге қол жеткізіп отыр.
Суретте: (солдан оңға қарай) Б. Әлімбаев,
М. Еламан, Т. Нұрсейіт, Р. Абдуллаев.
Бағдат ҚАЗКЕНОВ.
