Заман дамып, ақпарат толассыз жауып жатқан уақытта ауылда пошта жоқ дегенге кім сенеді? ХХІ ғасырда поштасы жоқ ауылды да көзіңіз шалып жатса, таңқалмаңыз.
Біз Сарысу ауылының тұрғындары «Қазпошта» АҚ-ның пошта қызметін пайдалана алмай келе жатқанымызға біраз уақыт өтті. Ауылда пошта бөлімшесінің жұмысы әлі күнге дейін жолға қойылмай келеді. Мемлекет басшысы Қасым-Жомарт Тоқаев ауылдарға көңіл бөліп, оны дамыту керектігін айтуын айтып-ақ келеді. Бірақ, оған құлақ асатын жергілікті биліктің әзірше ыңғайы көрінбейді.
Тұрғындар газет-журнал жаздырып алуға қол жеткізе алмай отыр. Тіпті, зейнетақыны, арнайы төлемдерді сабылып Жезқазған қаласына барып аламыз. Қыстың көзі қырауда, жазғы аптап ыстық пен көктемнің ми батпағында мысты шаһарға жету де үлкен кісілерге оңай соқпайды. Сондықтан «Қазпошта» АҚ Сарысу ауылына бір бөлімше ашып, оған терминалдар орнату жағын ескерсе дейміз.
Тұрғындарды қалаға сабылтпай, пошта қызметіне қатысты шаруаларды өз ауылымызда шешкенге не жетсін?! Президент пәрменіне құлақ асар билік болса, біздің осы мәселемізді шешіп береді деп сенеміз!
Сондай-ақ оқыңыз
Ауыл ардагерлері атынан өтініш білдірушілер: Ж. Әшенов, Ө. Әбікенов, М. Бұзауов, А. Жағыпаров, Б. Мусин, С. Дүйсенбеков.
