Ауыр өндіріс жағдайында ауысыммен еңбек ететін жұмысшы үшін құнарлы тағамның алар орны айрықша. «Қазақмыс» корпорациясы өзінің құрылымдық нысандарында асхана мәселесіне аса көңіл бөлген. Қарағанды өндірістік алаңындағы «Нұрқазған» кен байыту фабрикасына барғанымызда ондағы асхананың мән-жайымен танысып қайттық.
«ТехноЭксперт» ЖШС-не қарасты асхананың ас мәзірінде қалаған тағамыңызды іше аласыз. Асхана меңгерушісі Жаннар Байжұманованы әңгімеге тартқанымызда, асхана күніне 250 адамға дейін қабылдауға қауқарлы деді.
– Асхананың меншік иесі фабрика еңбеккерлерінің тойымды әрі пайдалы тағамдармен қамтылуына көңіл бөледі. Асхана он сегіз адамды тұрақты жұмыспен қамтып отыр. Бір ауысымда сегіз адам жұмыс істейді.
Бас аспазшының қолынан шыққан ыстық және жеңіл тағамдар, дәруменге бай салаттар дастарқанға қойылады. Ас мәзірінде өзіміздің шағын наубайханамызда пісірілген нан мен түрлі тәттілер бар. Асханада санитарлық талаптар толығымен ескеріледі, Асхана қызметшілері медициналық тексерістен өтіп тұрады. Аспазшыларымыздың шын көңілмен дайындаған асына байытушыларымыз әлі сын айтып көрген жоқ, – деді Жаннар Дәулетжанқызы.
Ас – адамның арқауы десек, оның құнарлы әрі денсаулыққа пайда болуына баса мән беретін асхана байытушылардың игілігі үшін талапқа сай жұмыс істеуде.
Бағдат ҚАЗКЕНОВ.
