Кімдер келіп, кімдер кетпеген мына тұрлаусыз жалғаннан. Арқа ақпаратының ақтаңкері, ардагері, Қазақстанның Құрметті журналисі, ақын, жазушы Базарбай Әлеуханұлының баз кешкеніне де бір жыл болып қалыпты. Күні кеше артында қалған әріптестері, шәкірттері мен бауырлары қаламгердің есімін мәңгі есте қалдыратын сауапты іс жасады.
Бүгінгі «Ұлытау», бұрынғы «Дидар» телеарнасы жайлы әңгіме қозғалғанда ойымызға Базарбай Әлеуханұлы оралады. Оған негіз де жоқ емес. Өйткені, аталмыш арнаның кешегі оңтайландыру жылдарында өз көрермендерінен ажырамауына, оның іргелі ұжымға айналуына Базекеңнің сіңірген еңбегі аз болған жоқ. Аталмыш кешенді жиырма жылға жуық уақыт басқарып, кемеліне келтіріп, жаңадан құрылған Ұлытау облысына тегеурінді телеарна қалпында табыстаған еңбегі жұртшылық жадында. Оған күні кеше жасалынған шара айқын айғақ. Өткен аптаның соңында «Ұлытау» теле-радио кешені ғимаратының қабырғасына Базарбай Әлеуханұлының рухына мемориалдық тақта орнатылды. Шараға қаламгердің шәкірттерімен бірге жергілікті билік өкілдері, рухани достары мен замандастары қатысты.
Жиында Ұлытау облысы әкімі аппараты басшысының орынбасары Ақжол Құрмансейіт сөз сөйлеп, жылы лебізін білдірді.
– Мемориалдық тақтаның осы телеарна ғимаратының қабырғасына орнатылуы Базарбай Әлеуханұлының кешегі оңтайландыру жылында тұралап қалған телеарнаның тамырына қан жүгіртіп, қатарға қосқан еңбегін бағалағандық. Сол кездері дұрыс жол таңдап, жүйелі жұмыс ұйымдастырылудың арқасында кешегі «Дидар» телеарнасы бүгінде «Ұлытау» деген атауға ие болып, өз көрермендерімен қауышып отыр, – деді өз сөзінде Ақжол Ахатұлы.
Сауапты шарада қаламгердің аға әріптесі Аманжол Үсенов, рухани достары – «Қазақтың Кетбұқасы» қоғамдық бірлестігінің төрағасы, Қазақстанның Құрметті металлургі Төлеген Бүкіров пен елі «Дәри-дай ақын» атаған жерлесіміз, белгілі айтыс ақыны, Қазақстанның Еңбек сіңірген қайраткері Мұқаш Сейтқазинов сөз сөйлеп, ақжарма тілектерін арнады.
– Базекең қандай да болса құрметке лайықты азамат еді. Бүгін осындай іс атқарып, рухына кұрмет көрсетіп жатқан шәкірттеріне айтар алғысым зор. «Жақсының аты өлмейді» дейді дана халқымыз. Базарбай Әлеуханұлының есімі де енді елдің жадында мәңгі қалары сөзсіз, – деді Мұқаш Сейтқазинов тебірене тұрып.
Қаламгердің рухына көрсетілген құрмет бір бұнымен шектелген жоқ. Арнайы ас беріліп, құран бағышталды. Сол астың үстінде Базекеңнің көзі тірісінде жазған сатиралық туындылары жинақталып басылған кітаптың тұсаукесері де өтті. Орайы келгенде айта кетейік, Базарбай Әлеуханұлы қаламы қарымды журналист қана емес, айтулы ақын һәм тілінің тікені бар сатираның да сардары бола білген жан. Шәкірттерінің қолдауымен оның сол сатиралық әңгімелері жинақталып «Ұят болады» деген атпен жарық көрді. Сатиралық жинақ Астана қаласындағы «Кәусар» баспасынан басылып шықты.
Ай НУРИ.
