Ұлттық мереке – Республика күні қарсаңында өңіріміздің өркендеуі мен тұтас еліміздің дамуына өздерінің сүбелі үлестерін қосып жүрген бірқатар тұлғаларға Ұлытау облысының Құрметті азаматы атағы табыс етілді. Құрметті атақты иелеріне облыс әкімі Берік Әбдіғалиұлы мен облыстық мәслихаттың төрағасы Бауыржан Шыңғысов салтанатты түрде табыс етті.
Ұлытау облысының Құрметті азаматы атағын алғандардың қатарында әріптесіміз, өңіріміздегі бұқаралық ақпарат саласының ардагері, Қазақстанның құрметті журналисі, «Құрмет» орденінің иегері, ҚР Жазушылар одағының мүшесі, ақын, жазушы Батырбек Мырзабеков ағамыз да бар.
Ұлт ұясы атанған Ұлытау өңірінің тумасы Батырбек Тиыштықбайұлы еңбек жолын мәдениет саласынан бастаса да саналы ғұмырын өңіріміздің бұқаралық ақпарат саласын дамытуға арнаған жан. Журналистік еңбек жолын Ұлытау аудандық «Ұлытау өңірі» газетінде әдеби қызметкер болып бастап, осы газеттің жауапты хатшысы лауазымына дейін көтерілді. Сексенінші жылдардың басында Жезқазған облыстық «Жезқазған туы» газетіне қызметке келіп, зейнет жасына шыққанға дейін облыс ақпаратының айдынында желкенін жайды.
Қаламгер аға зейнетке шыққаннан кейін де қол қусырып қарап отырған жоқ. Ұрпақ санасын серпілтетін бірнеше тарихи романдар мен поэмалар жазып, бастырды.
Ұлық мереке қарсаңында, сондай-ақ, қазақ өнерінің алыбы, ұлт мұрасына еңбегі сіңген дауылпаз дауыс иесі, Жаңаарқа ауданының тумасы Қайрат Байбосыновқа, ғалым, ҚР Ұлттық ғылым академиясының президенті, QazVac вакцинасын әзірлеуші, Ұлытау ауданы, Қарсақбай кентінің тумасы Күнсұлу Закарияға, С. Қожамқұлов атындағы Жезқазған қазақ музыкалық драма театрының артисі, «Құрмет белгісі» орденінің иегері, ҚР Халық артисі Досжан Жанботаевқа, құрметті профессор, «Құрмет» орденінің иегері Қайсар Телешовке берілді.
– Ұлытау облысының құрметті азаматтарын бүгінгі марапаттарымен шын жүректен құттықтаймын! Облысымыздың дамуына ел көлемінде үлес қосып, аянбай еңбектеніп жүргендеріңізге алғыс білдіремін, – деді өз сөзінде Берік Әбдіғалиұлы.
Ізтай БЕЛГІБАЙҰЛЫ.
