Ұлытаудағы «Даму» кәсіпкерлікті дамыту қоры өңірдегі бұқаралық ақпарат құралдары өкілдеріне арнап пресс-тур ұйымдастырды. Шараға қатысушылар жеке және мемлекеттік бағдарламалар аясында кәсіпкерлікті дамытуға қолдау алған кәсіпорындарды аралады.
Ұлытау облысында «Даму» кәсіпкерлікті дамыту қоры 2022 жылы құрылды. Қор шағын және орта бизнесті қолдауға бағытталған. Осындай мүмкіндіктердің арқасында өңірде «Даму» қоры арқылы мемлекеттік қолдауға ие болған кәсіпкерлер қатары артып келеді. Мәселен, 2024 жылдың басынан бастап «Даму» қоры Ұлытау облысының шағын және орта кәсіпорындарына жалпы сомасы 13,6 млрд теңгеге қолдау көрсетті. Барлығы 344 жоба қолдау тапты.
Бұл жөнінде «Даму» қорының Ұлытау облысы бойынша аймақтық филиалының директоры Арман Менжасаровтың айтуынша, Ұлытау облысында 2023 – 2024 жылдар аралығында мемлекеттік қолдау алған кәсіпкерлер 1182 жұмыс орнын сақтап қалды. Олар бюджетке 8 млрд теңге салық төледі.
Баспасөз туры аясында БАҚ өкілдері жақында ғана ашылған балет мектебіне аялдады. Жанат Шубаеваның кәсіппен айналысқанына биыл 20 жылдан асты. 2023 жылы балет мектебін ашу мақсатында 2021 – 2025 жылдарға арналған Ұлттық кәсіпкерлікті дамыту бағдарламасы бойынша жылдық 21,75 %-бен несие алған. 7 пайызын кәсіпкер төлесе, қалған айырмашылықты «Даму» қоры арқылы мемлекет субсидиялайды.
Кәсіпкерлікті дамытудың ұлттық жобасы аясында Жезқазған қаласында «Еңбек Арена» футбол алаңы да ашылған болатын. Бұл нысан Ұлытау өңіріндегі балаларды спортқа баулу және футболды дамыту мақсатында салынған.
Келесі барған нысан Сәтбаев қаласындағы минералды және жеміс сусындары зауыты болды. Компания 2000 жылы құрылған және «Ұлытау» брендімен тазартылған ауыз су өндіруге маманданған. Су Есқұладан алынады. Тәулігіне 15000 бөтелке су мен сусын шығарады. Өндірілген өнім өндірістің барлық кезеңдерінде қатаң бақылаудан өтеді, бұл кәсіпорынның өндіріс көлемінің өсуіне оң әсер етуде және ішкі нарықта тұтынушы базасын ұлғайтуға көмектесуде. Кәсіпорын 2021-2025 жылдарға арналған ұлттық кәсіпкерлікті дамыту жобасы бойынша мемлекеттік қолдауға ие болып, зауыттың өндірістік қуатын арттырып, өнім түрлерін кеңейтуге мүмкіндік алды.
Гүлім МАРАТҚЫЗЫ.
