Фотоаппаратын серт ұстап, Жезқазған өңіріндегі іс-шаралардың үнемі ортасынан табылатын Виктор Шавневті көпшілік жұрт жақсы біледі. Фотосуреттерімен өңір шежіресін өрнектеген Виктор Иванович биыл 70 жастың желкенін керіп отыр. Осыған орай, қала мерейтойы аясында «Жезказганский вестник» газеті редакциясының қолдауымен және Ұлытау облысы тарихи-археологиялық музейінің ұйымдастыруымен фото шеберінің 70 жасқа толу құрметіне арналған «Мир моими глазами» атты фотокөрменің тұсаукесер рәсімі салтанатты шараға айналды.
Виктор фото түсіру өнерімен оқушы кезінен айналысты. Ержеткенде құрылыста еңбек еткенде де бұл әуестігінен айрылған жоқ. Өзі құрдасы болып табылатын Жезқазған қаласындағы көптеген нысандарда оның құрылысшы ретіндегі қолтаңбасы бар десек болады. Ол 2007 жылдан бері газеттің фото тілшісі болып сурет түсірумен тынымсыз айналысуда. Виктор Иванович Чернобыль ардагері.
Көрме залындағы тұсаукесер салтанатында Жезқазған қаласы ішкі саясат бөлімінің басшысы Қаламқас Әбдуалиева, мәдениет және өнер бөлімінің басшысы Айгүл Сарбаева, облыстық қоғамдық даму басқармасы ақпараттық саясат және БАҚ мониторингі бөлімінің басшысы Гүлшат Әшірбекова мерейтой иесін құттықтап, құрмет көрсетті. «Жезказганский вестник» газетінің бас редакторы фототілші Виктор Шавневтің қарапайым қасиеті мен еңбекқорлығына ризашылығын білдіре келіп, Алғыс хатпен марапаттады, 100 мың теңгенің сертификатын тапсырды. Басқа да әріптестері мен ниеттес жандар құттықтау тілектерін білдірді.
Салтанатты шараға қатысушылар фотографтың көрмеге қойылған бірнеше бөлімнен тұратын фотосуреттерін сүйсіне тамашалады.
Амандық РАХҰЛЫ.
