Ауыр өндіріс жағдайында еңбек етіп, түрлі дәрежеде денсаулығына зақым келген еңбеккерлердің көбі өндірістен алған жарақатына нақты диагноз қоюда әуре-сарсаңға салынатыны шындық.
Осы орайда кәсіподақтар ұйымы Қарағанды қаласындағы Еңбек гигиенасы және кәсіптік аурулар ұлттық орталығына ұлттық статус беріп, науқастарға сонда көмек көрсету мәселесін көптен қозғап жүр. Әсіресе, «КәсіпҚорған» кәсіподағы бұл орталықтың қажеттілігін дәлелдеп берді. Ұйымның төрағасы Уәлихан Нұржановтың көтерген мәселесіне жақында Қазақстан Республикасының Денсаулық сақтау министрлігі Медициналық көмекті ұйымдастыру департаментінің директоры Азамат Дүйсенов жауап берді.
Жауап хатта: «Қазақстан Республикасының Денсаулық сақтау министрлігі өз құзыреті шегінде кәсіптік аурулар қызметін қалпына келтіру мәселесі бойынша төмендегілерді хабарлайды.
Қазақстанда 2019 жылға дейін ҚР ДСМ «Еңбек гигиенасы және кәсіптік аурулар ұлттық орталығы» Ақтөбе, Шымкент және Өскемен қалаларындағы филиалдарымен кәсіптік аурудың еңбек (қызметтік) міндеттерін орындаумен байланысты мамандандырылған медициналық көмек және сараптама көрсетті.
Сондай-ақ оқыңыз
Мемлекеттік нысандарды оңтайландыру мақсатында және Қазақстан Республикасы Үкіметінің 2018 жылғы 16 қазандағы № 646 қаулысына сәйкес ҚР ДСМ «Еңбек гигиенасы және кәсіптік аурулар ұлттық орталығы» Қарағанды медицина университеті бірігу және қайта құру жолымен қайта ұйымдастырылды.
Қазіргі уақытта еңбек жағдайларының адам ағзасына әсерін зерттеу, кәсіптік аурулардың алдын алу және емдеумен орталықтың құрылымдық бөлімшесі – қоғамдық денсаулық сақтау және кәсіптік Денсаулық институты айналысады.
ҚР Денсаулық сақтауды дамытудың 2026 жылға дейінгі Тұжырымдамасын іске асыру шеңберінде (2022 жылғы 24 қарашадағы № 945 ҚРҮК) ҰБХ КЕАҚ Директорлар кеңесімен бірлесіп, Еңбек гигиенасы мен кәсіптік аурулардың ұлттық орталығын құру үшін қоғамдық денсаулық сақтау және кәсіптік Денсаулық институтын ҰБХ КЕАҚ-нан республикалық мемлекеттік меншікке беру мүмкіндігі қаралатын болады.
Әкімшілік-өндірістік Кодекстің 91-бабына сәйкес қабылданған шешіммен келіспеген жағдайда, сіз оған заңнамада белгіленген тәртіппен шағымдануға құқылысыз» – деп атап көрсетілген.
Бағдат ҚАЗКЕНОВ.
