Мамандандырылған жөндеу-механикалық басқармасының әкімшілігі мен ондағы «КәсіпҚорған» Сервистік өндірістер кешені Жезқазған филиалының кәсіподақ комитеті кеншілер мен байытушылардың кәсіби мерекесін биыл ерекше бағдарламалармен атап өтті.
Басқарма ауласына киізүй тігіліп, еңбеккерлер арасында түрлі спорттық шаралар ұйымдастырылды. Өндіріс озаттары мен басқарманың еңбек ардагерлерінің құрметіне дастарқан жайылды. Мерекені атап өту қарсаңында еңбек озаттарының құрметіне арналған салтанатты жиында басқарма еңбеккерлері «Қазақмыс» корпорациясы басшылығының, «КәсіпҚорған» кәсіподағының, «АМАНАТ» партиясы мен тағы да басқа ұйымдардың марапаттарына ие болды. Ұжымды төл мерекемен құттықтаған директордың міндетін атқарушы Марат Ахметзянов басқарманың табысты еңбек етуіне лайықты үлес қосқан үш майталманды «Еңбек даңқы» төсбелгісімен марапаттады. Олардың қатарында Мұқат Садықов, Қуандық Жақсылықов, Құрманғазы Миркинов бар.
«КәсіпҚорған» Сервистік өндірістер кешені Жезқазған филиалының кәсіподақ комитетінің төрағасы Серік Алтынбеков ұйым басшылығының атынан бірқатар еңбеккерге Құрмет грамотасын тапсырды. Бұл мерекеде «КәсіпҚорған» кәсіподағы атынан 80-ге жуық еңбеккер марапатқа ие болды.
Бағдат ҚАЗКЕНОВ.
