Нұр-Сұлтан қаласында Қазақстан Республикасы Индустрия және инфрақұрылымдық даму министрлігі мен Тау-кен металлургия өндірісі еңбеккерлерінің салалық кәсіподақтары, Тау-кен өндірісінің Жұмыс берушілер ассоциациясы үш жақты салалық келісімге қол қойды.
Оған Индустрия және инфрақұрылымдық даму вице-министрі Марат Қарабаев, Тау-кен өндірісінің Жұмыс берушілер ассоциациясының Атқарушы директоры Николай Радостовец, салалық кәсіподақтардың төрағалары қатысып, келісім түйінделді.
Аталмыш құжат Еңбек Кодексі негізінде түзілген жұмыс беруші мен жұмысшы арасындағы келісім-шарттағы көзделген міндеттерді жүзеге асыруға мүмкіндік береді. Тау-кен, металлургия және салалық өнеркәсіп жұмысшыларының құқықтары мен мүдделерін қорғауда басты құжат болып табылатын еңбек келісім-шартында бектілген бірқатар бөлімдердің маңыздылығын төрт кәсіподақ ұйымы қорғай отырып, жалақыны көтеру, еңбек жағдайы мен экология мәселесіне баса мән берілді.
Тау-кен – металлургия және аралас өндіріс еңбеккерлерінің «КәсіпҚорған» кәсіподағының төрағасы Ерболат Сатыбалдин жұмысшы мен жұмыс беруші арасындағы келісім-шарттағы міндеттердің сәтті жүзеге асуына кәсіподақ ұйымы атсалысатынын жеткізді.
Айта кетейік, салалық кәсіпорын еңбеккерлерінің мүддесіне қызмет жасауды ендігі жерде «КәсіпҚорған», «КазПрофМеталл» ұйымдарымен қатар «Еңбек» және «Қазақстан көміршілері» кәсіподағы да өз міндеттеріне алып отыр.
Бағдат ҚАЗКЕНОВ
«Мысты өңір»
