Жырақта жатқан қала, кенттер де өркениеттен тыс қалмауы керек. Соңғы жылдары Қаражал қаласында тұрғынүй құрылысы қайта жанданды.
Оған дәлел – қаланың Тәуелсіздік көшесі, 12 мекенжайында орналасқан 4 қабатты тұрғынүй. Қазір тұрғынүйде қайта жөндеу жұмыстары жүргізілуде. Аяқталуға да жақын. Үйді қалпына келтіру жұмыстарын «Иман» жауапкершілігішектеулісеріктестігі 2022 жылы бастаған болатын. Алайда, мердігердің жауапсыздығынан арадағы келісім-шарт бұзылған. Нысан бойынша мемлекеттік сатып алу қайта жүргізіліп, «ГрандСтройСервис» ЖШС жеңіп алды. Жауаптылардың айтуынша, қазір жұмыс жоспарға сәйкес жүргізіліп жатыр, қараша айында тұрғындар игілігін көретін болады.
Қаражал қаласының әкімі Тілектес Досаев жұмыстың барысымен толық танысып шықты. Жалпы, үй 4 қабатты, 3 кіреберісі бар, 36 пәтерден тұрады. Жобаның құны – сараптама қорытындысы бойынша 487,9 млн теңге.
Айта кетейік, қазір қала, аудан депуттатары мен қоғамдық кеңес мүшелері өздеріне бөлінген аумаққа мониторинг жүргізіп тұрады. Аталған құрылыс та олардың назарына алынған.
Гүлім МАРАТҚЫЗЫ.
