Геолог дегенде біздің көз алдымызға сағым ойнаған сар далада жер қойнауына сүңгілерін бойлатып жүрген, тау-төбені кезіп, қолындағы балғасымен тапқан тастарын ұнтақтап отыратын жандар елестейтіні жасырын емес. Әйтсе де, жер астында, шахталардың телімдерінің де өз геологтары болатынын екінің бірі біле бермейді. Біздің бүгінгі кейіпкеріміз Айым Сейткен – сондай геологтардың бірі.
Айым Шығыс Жезқазған кенішіне қарасты Анненск шахтасының 84-ші телімінде геолог болып еңбек етіп келеді. Ол күн сайын өзге шахтерлармен бірге басына каскасын киіп, қолына қажетті құрал-саймандарын алады да шыңырауға түседі. Оның басты міндеті кеннің бай көзін бағамдау, қазылған кеннің құрамын анықтау. Мұның бәрі өз алдына үлкен бір ғылыми жұмыс.
– Біз кен қазылатын жерден шламның үлгісін аламыз да оның сапасын тексереміз. Ең бастысы сол жердегі кеннің құрамын, оның қаншалықты бай екенін анықтап, одан мейлінше мол өнім алуды ойластыру, – дейді Айым өз қызметінің негізгі мақсаты жайлы әңгімелей келіп.
Геолог қыздың әңгімесінен ұққанымыз, оның алынған шыламның әшейін тас емес, оған ел байлығын молайтатын сапалы мысты сараптайтын өз алдына маңызы зор дүние деп қарайтыны. Осы мақсатта ол күнде кен бұрғылап жатқан жігіттердің қасына барып, бұрғыланған жерден шлам алып, оны мейлінше зерделейді. Бұрғышылардың белгіленген бағыттан ауытқымай, жоспарланғандай жұмыс істеуін қадағалайды.
Сондай-ақ оқыңыз
– Мен үшін, менің жұмысымның өңірге ғана емес, тұтас еліміз үшін пайда әкелгені маңызды. Сапалы сары мыз біздің, тұтас еліміздің ортақ байлығы. Сол байлықты молайтуға өзімнің азғана болса да үлесімді қосып жүргенімді мақтан етемін, – дейді ол бізбен әңгімесінде.
Ізтай БЕЛГІБАЙ.
