Сайын далада сағымдай жортып жүрген ақбөкені былтырғы жылдың қысынан бері Ұлытау облысынан жылыстап кете алмай, климаты шұғыл құбылмалы өлкеде мекендеп қалды. Тебіндеп азығын табатын киіктің көбі аштықтан әлсіреп, төңіректе өлексеге айналды.
Көктем шыға ақбөкендердің сол ұшалары Жезқазған, Қаражал маңынан топ-тобымен аршып алынды. Жезқазған қаласының тұрғындарын алаңдатқан мәселе осы өлекселердің шаһар үшін жалғыз тіршілік көзі саналатын Кеңгір су қоймасында ұшалардың қалқып шығуы болды. Ұлытау облысының әкімі Дастан Рыспековтің тапсырмасына орай, өлекселерді жинау жұмыстары ұйымдастырылды. Облыс аумағындағы Жезқазған және Қаражал қалалары бойынша 1 сәуірдегі ақпаратқа сүйенсек, 6 919 бас киік ұшасы табылып, олар арнайы мал өлексесін көметін орынға тасталған.
Жезқазғанды су көзінің 70 пайызымен қамтып отырған Кеңгірдегі өлекселерді сүзіп алу жұмыстарына Төтенше жағдайлар басқармасының арнайы құрамы жұмылдырылған. Осы су қоймасының өлекселерден кейінгі санитарлық жағдайы қала халқын алаңдатып отыр. Кеңгірдің бүгінгі күнгі санитарлық ахуалын білу мақсатында Ұлытау облысы санитарлық-эпидемиалогиялық департаментінің Жезқазған қалалық санитарлық-эпидемиологиялық басқармасына хабарласқан болатынбыз.
Басқарма басшысы Нұрбол Жолдыбаевтың айтуынша, қазіргі күні су қоймасының санитарлық жай-күйі бақылауда.
Сондай-ақ оқыңыз
– «Жезқазған жылумен, сумен жабдықтау кәсіпорны» ЖШС өндірістік зертханасымен бірлесіп 2025 жылғы 21 наурызда микробиологиялық және санитариялық-химиялық көрсеткіштерге, соның ішінде органолептикалық қасиеттері, ауыз су қауіпсіздігінің жалпыланған көрсеткіштерді зерттеу үшін бірінші көтергіш сорғы станциясынан (Кессон) су үлгілеріне іріктеу жүргізу туралы шешім қабылданды.
Зерттеу барысында судағы азот бойынша қаттылық пен аммиакты анықтауға баса көңіл бөлінді. Себебі, мұндай жағдайда аммиактың көрсеткіші жоғары болады. Кеңгір су қоймасынан алынған сынамаларда мұндай көрсеткіш шыққан жоқ. Қалыптасқан жағдайға байланысты Жезқазған санитарлық-эпидемиологиялық басқармасы мен «Жезқазған жылумен, сумен жабдықтау кәсіпорны» ЖШС алдағы кезеңдерде де бірлескен жұмыстарды атқара береді, – деді басқарма басшысы.
Бағдат ҚАЗКЕНОВ.
