Тау-кен, металлургия және аралас өндіріс еңбеккерлерінің «КәсіпҚорған» кәсіподағы Қарағанды филиалының ұйымдастыруымен Қарағанды өңіріндегі «Қазақмыс» корпорациясы» ЖШС құрылымында еңбек ететін еңбеккерлер арасында спартакиада өтті.
Салауатты өмір салтын насихаттап, еңбеккерлерді спортпен шұғылдануға үндеген жарыс кеншілер мен байытушылардың құрметіне арналды. Спартакиадаға қатысу еңбеккерлердің денсаулығын нығайтып қана қоймай, ұжымды біріктіреді, спорттық іс-шараларға қатысуға ынтасын арттырады. Шағын футбол, ерлер мен әйелдер арасында волейбол, үстел теннисі, жеңіл атлетика сынды спорт түрлерін қамтыған жарыс тартысты өтті. Атап өтейік, бұл спорттық бәсекеде аймақтағы кен өндірісінің алыбы «Нұрқазған» кенішінің еңбеккерлері оқ бойы озық шығуға ұмтылды. Ұжымның намысын қорғағандар жеңіс туын желбіретті. Атап айтқанда, үстел теннисінен Есен Құлахметов І орынды жеңіп алса, ІІ орынның жүлдесін де нұрқазғандық Аян Шәкенов еншіледі. ІІІ орын «Барлау» кенішінен Санжар Шерубаевқа бұйырды.
Жеңіл атлетикадан командалық есеп бойынша І орынды «Нұрқазған» кенішінің командасы алса, ІІ орын Қарағанды құю-машина жасау зауыты командасының үлесіне тиді. ІІІ орынмен цифрландыру қызметінің командасы марапатталды. Әйелдер арасында ұйымдастырылған үстел теннисінен І орын «Нұрқазған» байыту фабрикасынан Маржангүл Әнуашқа тиесілі деп танылса, «Нұрқазған» кенішінен қатысқан Шолпан Ахметоваға ІІ орын бұйырды. ІІІ орын Қарағанды құю-машина жасау зауытының еңбеккері Айнұр Сарыбаеваның еншісіне тиді. Волейболдан командалық есепте «Нұрқазған» кеніші топ жарса, ІІ орынды Қарағанды құю-машина жасау зауытының командасы алды. ІІІ орын Қарағайлы байыту фабрикасына бұйырды.
Жеңіл атлетикадан І орын «Нұрқазған» кенішінен Ағыбай Нығыметовке тиесілі деп танылды. ІІ орынды «Қазақмыс Коал» ЖШС-нен Батырхан Тұмов еншілесе, ІІІ орын «Нұрқазған» кенішінен Медет Жайлаубаевтың үлесіне тиді. Әйелдер арасында І орынға «Нұрқазған» кенішінен Сәуле Бедербекова лайық деп танылса, ІІ орынды Қарағанды құю-машина жасау зауытынан Наталья Тоқмақова алды. ІІІ орынмен цифрландыру қызметінен Нұрсұлу Кәкетаева марапатталды. Шағын футболдан І орын «Қазақмыс Коал» ЖШС-не бұйырса, ІІ орын Қарағайлы байыту фабрикасына, ІІІ орын «Қазақмыс Барлау» ЖШС командасына берілді.
Жарыс қорытындысында төрешілердің ұйғарымымен спартакиадада «Нұрқазған» кеніші еңбеккерлерінің спорттағы ептіліктері мен салауатты өмір салтына деген ынталары жоғары бағаланды.
Бағдат ҚАЗКЕНОВ.
