«Қазақмыс Смэлтинг» ЖШС және Жезқазған мыс қорыту зауытының басшылығы металлургтердің кәсіби мерекесінде спорттың төрт түрінен жарыс ұйымдастырды.
Оның ашылуына Жезқазған қаласы әкімінің орынбасары Бақытжан Жайлаубаев, «Қазақмыс Смэлтинг» ЖШС Бас директоры Жәнібек Байғабелов, сала ардагерлері қатысып, жарысқа қатысушыларға сәттілік тіледі.
Бір күн бойы Жезқазған қаласындағы спорт сарайын дүбірге бөлеген бәсекеде металлургтер қол күресі, кір тасын көтеру, қазақша күрес және садақ ату сынды спорт түрлерінен бақ сынады. Сайдың тасындай іріктелген зауыт еңбеккерлерінің ептілігіне қарай төрешілер әділ бағасын берді. Спорттың төрт түріне арнайы жүлделер тігілді. Жарыс қорытындысы бойынша қол күресінен І орынды Ерасыл Әмірғали жеңіп алса, ІІ орынды Әсет Әуезов еншіледі. ІІІ орынның жүлдесін Нұрсұлтан Қоныспаев қанжығасына байлады.
Кір тасын көтеруден Роман Пиксайки І орынның тұғырына көтерілсе, ІІ орынның жүлдесіне Әлімжан Нұркамал лайық деп танылды. ІІІ орынмен Ерлан Ыдырыс марапатталды. Қазақша күрестен 80 келі салмақ дәрежесіне дейін І орынды Әнуар Әбдіғалиев жеңіп алса, Мақсат Маханбетовке ІІ орынның жүлдесі бұйырды. ІІІ орынға Марғұлан Әбжан тұрақтады.
Түйе балуан атағын сарапқа салғандара арасында І орынның жүлдесін Юсуп Хасанов алса, Мақсат Маханбетов бұл салмақта да ІІ орынға көтерілді. ІІІ орын Арман Аянбаевқа тиесілі деп танылды. Садақ атуда мергендік танытқан Дастан Төлегенов І орынды, Абылай Туғанбай ІІ орынды алды. Алмаз Қасқырбаевтың қанжығасына ІІІ орын бұйырды.
Сондай-ақ, зауыттағы «КәсіпҚорған» кәсіподағы комитетінің төрағасы Ардақ Ақылбекова жарыста ерекше көзге түскен қатысушыларға ұйым тарапынан арнайы номинациялар тапсырды.
Бағдат ҚАЗКЕНОВ.
