1 маусым —Халықаралық балаларды қорғау күніне арналған мерекелік шара Сәтбаев қаласында көрініс тапты.
«Қазақмыс» корпорациясының қолдауымен «Балалық шаққа саяхат» атты мерекелік бағдарлама балалар мен ата-аналарға қуаныш сыйлады.
Мереке мектеп оқушылары қатысқан асфальтқа сурет салу байқауынан басталды. Жас суретшілер өз армандары мен қиялдарын түрлі-түсті туындылар арқылы бейнеледі.
Қонақтар үшін Сәтбаев қаласының үздік шығармашылық ұжымдарының концерттік бағдарламасы ұсынылып, ұлттық және заманауи билер, вокалдық және аспаптық шығармалар орындалды.
Бағдарламаның жарқын сәттерінің қатарында әсерлі крио-шоу, сиқыршы өнер көрсетуі, аниматорлардың қатысуымен өткен ойындар мен интерактивтер ерекше қызығушылық тудырды. Мереке аясында дарынды балалар мен жасөспірімдерге арналған «Жас Дарын – 2026» фестивалінің басталуы жарияланып, қатысушыларға жаңа мүмкіндіктер мен шығармашылық даму жолдары таныстырылды.
Кеншілер қаласының орталығында өткен мерекелік бағдарлама жоғары деңгейде өтті.
