«Жұмысшы мамандықтар қаласы» фестивалінің панельдік сессиясында «Kazakhmys Holding» ЖШС ұйымдастырушылық даму және персоналды басқару жөніндегі директоры Әлібек Алдоңғаров дарынды жастарды өндіріске тартуға бағытталған сәтті жобалар жайлы айтты.
Бастамаларды жүзеге асыруға «Қазақмыстың» Политехникалық және Технологиялық колледждері атсалысуда. Олар тау-кен саласында мансап құрғысы келетін жастарға зор мүмкіндік беріп отыр. Аталмыш колледждердің барлық студентіне компания атынан шәкіртақы және 3-4-курста оқитын студенттерге ақысы төленетін өндірістік тәжірибеден өту қарастырылған.
Компанияның «ЖОО-да оқу – өндірісте жұмыс істеу» бағдарламасы бойынша жастар тегін жоғары білім алады. Бір жылдан кейін осы бағдарлама бойынша компанияға 100-ден астам жас маманды жұмысқа қабылдау жоспарланған.
«Өндірістегі онлайн-тәжірибе» жобасы Қазақстанның түпкір-түпкіріндегі колледждер мен университеттердің студенттеріне тәжірибе жинақтауға көмектесті. 1 159 студент бес мамандық бойынша тәжірибеден өтті. Үздіктердің үздігі «Қазақмыстың» сыртқы кадрлық резервіне қабылданды.
Сондай-ақ оқыңыз
Соңғы үш жылда «Қазақмыстың» құрылымдық бөлімшелерінде жақын шетелдің және еліміздегі түрлі оқу орындардың 6 542 студенті оқу, танысу кезеңдерінен, өндірістік және дипломалды тәжірибеден, сондай-ақ дуальді оқыту жүйесі аясындағы даярлықтан өтті. Осы уақыт ішінде «Қазақмыс» колледждерінің 617 түлегі компанияның құрылымдық бөлімшелеріне жұмысқа орналастырылды.
Қазіргі заманғы тау-кен ісі мен металлургия саласы инновацияларға, қол еңбегін автоматтандыруға және «жасыл» экологиялық әдістерге жүгінуге басымдық береді. «Қазақмыс» осыны жас ұрпаққа өз үлгісі негізінде түсіндіруді маңызды міндет санайды.
«Қазақмыс» корпорациясы» ЖШС PR департаменті.
