«КәсіпҚорған» кәсіподағы Жезқазған филиалы мен «Қазақмыс» корпорациясы» ЖШС еңбеккерлерінің «Jastar Bolashaq» Жастар одағы бірлесіп ұйымдастырып келе жатқан «Қарлы қыс – 2024» қыс қызықтары жарысы биыл да жалауын көтермек.
Дәстүрлі түрде ұйымдастырылатын бұл жарыстың ауқымы кең. Қысқы спорт түрлерінен «Қазақмыс» корпорациясының өңірдегі құрылымдарының еңбеккерлері бақ сынап, үздіктері анықталады. Кәсіподақтың Жезқазған филиалының аппарат жетекшісі Жанар Салықова жарыста қандай қызықтар болатынын айтып берген болатын.
– Жыл сайынғы жарыстың бағдарламасын түрлендіріп отырамыз. Сәтбаев қаласындағы «Арена – 2005» спорт кешенінде 10 ақпанда бастауын алатын бәсекенің ауқымы кең. Шаңғымен, конькимен, шанамен, үрмелі қайықпен сырғанау және шахматтан жарыстар ұйымдастырылады. Балаларға арналған қар мүсіндер жасау байқауы, самаурын қайнату жарысы көздеген деңгейде өтеді деп сенеміз.
«Қарлы қыс – 2004» жарысының өтуіне «Қазақмыс» корпорациясы» ЖШС «Жезқазғантүстімет» ӨБ басшылығы мен өңірдегі өндіріс ошақтарының ұжымдары ерекше ықылас танытып келеді. Еңбеккерлер үшін өткізетін мәдени-спорттық шараларға қолдау танытқандары үшін алғыс білдіреміз, – деді Жанар Сәркенқызы.
Спорт десе делебесі қозатын барша «Қазақмыстың» еңбеккерлерін қос ұйым «Қарлы қыс – 2024» жарысына қатысуға шақырады.
Бағдат ҚАЗКЕНОВ.
