«Қазақмыс» корпорациясы» ЖШС өндірістері шоғырланған өңірлердің тұрғындарын әлеуметтік қолдау бойынша өзіне алған міндеттемелерін орындай отырып, білім күніне арналған қайырымдылық акциясын өткізді.
Бұл жолы «Қазақмыс» Балқаш қаласындағы көпбалалы және аз қамтамасыз етілген отбасылардан шыққан балаларға арналған мектеп-интернат тәрбиеленушілеріне көмек көрсетті. Металлургтер, «Қазақмыс Смэлтинг» ЖШС Бас директоры Жәнібек Байғабеловтың жетекшілігімен 45 балаға мектеп формасы мен аяқ киім сыйлады. Ал, 1 қыркүйекте балалар Білім мерекесіне жаңа киіммен келді.
– Біздің мектеп-интернатта 220 оқушы оқиды. Олардың 100-і біздің интернатта тұрақты негізде жатып оқиды. «Қазақмыс Смэлтинг» ЖШС-не қамқорлықтары үшін және металлургтер бізге ерекше ықылас танытқаны үшін алғыс айтқым келеді. Мұның сыртында, металлургтер жазғы кезеңде балаларымыз үшін Тораңғы тоғайына танымдық экскурсия ұйымдастырды. Мектеп пен кәсіпорын арасындағы байланыс болашақта да жалғасады деп ойлаймын, – деді оқу орнының директоры Асхат Талімов.
Қайырымдылық акциясы «Қазақмыс Смэлтинг» ЖШС ұйымдастырған маусым айындағы «CUPRUM RUN» марафонының тікелей жалғасы болды. Қатысушылардың жарналарынан жиналған барлық қаражат көп балалы және аз қамтылған отбасылардан шыққан балаларға арнайы мектеп формасын сатып алуға жұмсалды.
Сондай-ақ оқыңыз
«Қазақмыс Смэлтинг» ЖШС Балқаш өңірінің өміріне де белсенді қатысады. Ағымдағы жылы, қала аумағын көгалдандыру, «Бертіс» шығанағы аймағындағы Балқаш көлінің фаунасын сақтау және жақсарту бойынша науқан жүргізіп, су қоймасына тұқы балықтарын жіберу жұмыстары жүргізілді. Көлдің жағажай аймағында «Таза жағалау» акциясы бірнеше рет өткізілді. Жас шахматшылардың халықаралық және республикалық деңгейдегі турнирлерге қатысуына демеушілік жасалды. Осындай
әлеуметтік жобалар алдағы уақытта да жалғасын табады.
Ләззат СМАҒҰЛОВА.
