Жезқазған өндірістік аймағында 2013 жылға дейін кен байытқан №3 Сәтбаев байыту фабрикасы өндірістік үдерістерді тоқтатты. Бұл нысанда Сәтбаев қаласының маңында орналасқан кеніштерден жөнелтілген кендер байытылды.
Қазіргі таңда тек Жезқазған байыту фабрикасының құрамындағы өндірістік нысанда қалдық қоймасы ғана жұмыс жасап тұр. Апта басында №1,2,3 Жезқазған байыту фабрикаларының директоры Мұрат Бөрібаев нысанда болып, атқарылып жатқан жұмыстар жайлы кеңінен баяндады.
Жалпы аумағы 760 гектар болатын бұл қойма 2013 жылға дейін Сәтбаевтағы байыту фабрикасының қалдық қоймасы ретінде қызмет етсе, аталған фабриканың жұмысы уақытша тоқтауына байланысты қаладағы жылу қазандығының күлі төгілетін орын ретінде қажетке жарап келеді. Қойманың 360 гектардай болатын ашық бөлігінен желді күндері шаң көтеріліп, қала тұрғындарына қолайсыздық туғызып келген болатын. Шаңды басу үшін аталған аумақты суару әдісі қолданылды. Қойманы рекультивациялау (жабу) жұмыстары 2019 жылы басталды. Бірінші кезекте 60,2 гектар аумақ жабылды. 2021 жылы тағы 90,2 гектар аумақты жабу жұмысы басталды. Оны мердігер компания – «Спецмаш» ЖШС атқарды.
Компания басшылығының шешімімен, қала тұрғындарының, қалалық мәслихат, қоғамдық кеңестің өтінішімен қойманы биыл толық жабу туралы шешім қабылданып, қалған 212 гектар аумақты рекультивациялау үшін «Нұра Агро Құрылыс», «Sinergy» компаниялары мердігер ретінде тартылып, қазіргі таңда қойма басында қызу жұмыс жүріп жатыр. Бекітілген талап бойынша қоймадағы пульпа беті 30 см қалыңдықта тасты топырақпен жабылады.
– Қала іргесінде орын тепкен аумақтағы қалдықтарды жабу жұмыстары 2019 жылы басталды. Осы маңдағы Анненск-3 карьерінен тас үйінділері аршылып алынып, осы аумақты жабуда. Бұл жұмыстар биыл жыл соңында аяқталады. Қазақмыс басшылығы бұл бағытқа 997 920 000 теңге қаржы бөлді. «Нұра Агро Құрылыс», «Sinergy» компаниялары 50-ге тарта техниканы жұмылдырып, жұмысты кестеге сай сапалы орындауда, – деді Мұрат Ерболатұлы.
Бір сөзбен айтқанда, фабрикаға тиесілі қалдық қоймасы қараусыз емес. Оған корпорация басшылығы стратегиялық маңыздағы нысан ретінде көңіл бөліп отыр.
Бағдат ҚАЗКЕНОВ.
