Балқаш өңірінде Владислав Батырбаев есімді ел ағасы бар. Оны балқаштықтар, әсіресе, металлургия саласында тер төгіп жүрген азаматтар өз ісінің кәсіби шебері, білікті басшы әрі еңбеккерлердің шынайы жанашыры деп біледі.
Иә, бұл үш қасиет те Владислав Вагизовичтің бойынан табылады. Ол 40 жылын түсті металлургияның дамуына арнады. 1973 жылы Балқаш мұнай базасында 4-разрядты оператор болып еңбек жолын бастаған Владислав Батырбаевтың 39 жылы Балқаш мыс балқыту зауытымен тығыз байланыста өрбіді. Түрлі жауапты қызметтерді атқара жүріп, еңбекқорлығы мен өз ісіне деген адалдығын танытты. Өндірістік бөлім басшысының орынбасары, цех басшысы, жетекші технолог сынды жауапты қызметтерді жауапкершілікпен атқарды. Бірнеше жас буынды тәрбиеледі.
Қарапайым да салмақты Владислав Вагизович жұмысшы мүддесі мен құқығын қорғау жолында да аянып қалмады. Әсіресе, 2012 жылы «КәсіпҚорған» (бұрынғы «КәсіпҚазақмыс») салалық кәсіподағының керегесін керіп, шаңырағын көтеруде Владислав Батырбаев көп еңбек сіңірді. Балқаш мыс балқыту зауытында кәсіподақ комитеті жұмысының алға басуында кейіпкеріміз айтарлықтай шаралар жүргізді. Өндіріс ошағының жұмыскерлерінің кәсіподаққа деген сенімін арттыру жолында Владислав Вагизович өмірлік және өндірістегі тәжірибесін аяп қалған жоқ. 2012 жылдан 2019 жылға дейін Балқаш мыс балқыту зауытында «КәсіпҚорған» кәсіподағы комитетінің төрағасы қызметінде болғанда Владислав Батырбаев жұмысшы мен жұмыс беруші арасындағы дәнекер бола білді.
Қырық жылын өндіріске арнаған Владислав Батырбаев қарапайымдылығымен ерекшеленеді. Міне, сол қарапайым мінезі оны еңбекте абыройға бөледі. Жетпістің желкенін керген Владислав Батырбаевтың өмір жолы кейінгі жастарға үлгі.
