«Қазақмыс Холдинг» ЖШС отын-энергетика кешені қызметкерлерінің балаларына арналған білім беру бағдарламасы жүзеге асырыла бастайды.
Балалардың «Қазақмыс» есебінен «Мирас» деп аталатын бағдарлама арқылы энергетика және кен өндіру саласы бойынша жоғары білім алуларына және аталған салалардың кәсіпорындарында жұмысқа орналасуларына мүмкіндіктері мол. Бұл бағдарламаға техникалық және кәсіптік білім беру ұйымдарының студенттері мен түлектері, жалпы орта білім беру мекемелерінің оқушылары, университетте алғаш рет жоғары білім алып жатқан І, ІІ, ІІІ курс студенттері қатыса алады.
Бағдарламаның міндетті шарты – үміткердің ата-анасы өндіріс саласында 10 жылдан аса еңбек етуі керек. Бағдарлама жеңімпаздарының жоғары оқу орындарындағы ақысы толық төленеді. Мұнымен қоса, жоғары нәтижеге қол жеткізген жеңімпаз қосымша шәкіртақымен және университет жатақханасымен қамтамасыз етіледі.
«Мирас» бағдарламасы арқылы жеңімпаз С. Сейфуллин атындағы Қазақ аграрлық зерттеу университетін, А. Бүркітбаев атындағы энергетика және машина жасау институтын, Алматы энергетика және байланыс университетін, Мәскеу энергетикалық институтын, Сібір мемлекеттік геожүйелер және технологиялар университетін таңдай алады.
Сондай-ақ оқыңыз
Оқу аяқталғаннан кейін түлектер өндіріс нысандарының құрылымдық бөлімшелеріне жұмысқа орналастырылады. Мұнда кемінде 5 жыл еңбек етуі міндеттеледі. Бағдарламаға қатысу үшін өтінім беру мерзімі 2025 жылдың 15 шілдесіне дейін.
«Қазақмыс» корпорациясы » ЖШС баспасөз қызметі.
