Жезқазған қаласы әкімдігі аппаратының бас инспекторы Айдарбек Әлімжан шетелде кадрлар даярлау жөніндегі Республикалық комиссия отырысының шешімі бойынша «Болашақ» халықаралық стипендиясының иегері атанды. Ол енді қолға тиген жолдамасымен АҚШ-тың беделді оқу орындарының бірі – California-Davis университетінде Мемлекеттік және жергілікті басқару мамандығы бойынша оқитын болады.
Айдарбек Әбішұлы 2016 жылы академик Е. А Бөкетов атындағы Қарағанды мемлекеттік университетін бакалавр, құқықтану мамандығы бойынша бітіріп, еңбек жолын Жезқазған қаласы әкімдігінде тапсырмалардың орындалуын бақылау жөніндегі инспектор болып бастаған еді.
Содан бергі кезеңде қала әкімдігі аппаратындағы мемлекеттік-құқықтық жұмыс бөлімінің бас маманы, антитеррористік комиссия жөніндегі бас инспектор, мемлекеттік-құқықтық жұмыс бөлімінің бас инспекторы тәрізді лауазымдық жолдардан өтті. ҚР Президенті жанындағы мемлекеттік басқару академиясында оқып, магистратура, мемлекеттік және жергілікті басқару мамандығының академиялық дәрежесін алды.
Айдарбектің «Болашақ» стипендиясы арқылы Калифорния университетіне жолдама алуы шетелдің үздік оқу орнында білімін одан әрі жетілдіріп, кәсіби және ғылыми әлеуетін арттыруға жол ашып отыр.
Қала әкімі Қайрат Шайжанов мемлекеттік қызметте еңбек етіп келе жатқан уақыт ішінде Айдарбек Әлімжанның өзін жауапкершілігі жоғары, кәсіби білікті маман ретінде танытқанын атап өтіп, оның «Болашақ» бағдарламасы аясында білімін жетілдіруі Қазақстанның мемлекеттік басқару саласындағы жаңа идеялар мен халықаралық тәжірибені енгізуге қосылатын лайықты үлес болатындығына сенім білдірді. Стипендия иесін құттықтап, сәттілік тіледі.
Амандық РАХҰЛЫ.
