Оқу басталар шақта баланы мектепке дайындау жыл санап қиындап барады. Оған басты себеп – жыл сайын бағаның өсуі. Былтыр 30-35 теңгеге алған 12 парақтық дәптеріңіз биыл 40-45 теңге, тіпті 50 теңгеге дейін шарықтап кеткен.
Ауарайы секілді құбылатын бағаның орташа тұрмыстағы көп баласы бар отбасылардың бюджетіне қалай әсер ететінін бағамдап көріңіз. Жезқазған қаласының тұрғыны, Айнұр есімді жас анамен тілескенімізде:
– Баламызды оқу-құралдарымен қамтамасыз ету үшін биыл киімінен бөлек 10 мыңның көлемінде ақша жұмсалды. Көйлегі мен костюмін, спорттық киімі мен аяқкиімін қоса алғанда 50 мыңның шамасында қаржы кетті. Бұл орташа деңгейде баланы жабдықтадық дегеннің өзінде жұмсалған ақша. Ал, сықитып киіндіріп, бағасы қымбат оқу құралымен қамтамасыз етсеңіз, шығар шығын аз болмасы түсінікті. Мысал ретінде айта кетейін, тіпті қарапайым ермексаздың өзі 1000 теңгеден кем емес. Сапасы орташа деген 12 парақтық дәптердің де бағасы әр жерде әр қалай. Қалың дәптерлердің парағы сапалы дегендері – 500-600, орташасы 350-370 теңгені құрайды. Сонда бұл бағаға тұрақ болмай ма? Әзірге бір баламыз мектепке барады. Бір отбасынан 4-5 бала мектепке барады ғой. Оларды оқуға қамдау қыруар қаржыны қажет ететіндігі түсінікті. Бағаны тұрақтандырмаса келер жылы бұл бағалармен «жылап» көрісер халге жетпесек болды, – дейді.
Шынында да жыл сайын баға шарықтап барады. Мұны Оқу-ағарту министрлігі мен үкімет реттеп, қолға алмаса, келешекте балаларды толық оқу-құралы мен киім-кешегімен қамтамасыз ету ата-аналарға қиындық тудыра берері анық.
Бағдат ҚАЗКЕНОВ.
