«Бюджеттің мүмкіндігі мен міндеттемесін ескере отырып, мемлекет кепілдік беретін медициналық көмектің бірыңғай базалық топтамасын жасау қажет. Ал одан асып кеткен шығынның бәрі сақтандыру жүйесі арқылы төленуге тиіс», деп атап көрсетті Мемлекет басшысы өз Жолдауда. Яғни, кепілдендірілген тегін медициналық көмек аясында ақысыз түрде жасалатын бірегей оталардың саны артып, халыққа одан әрі қолжетімді бола түспек.
Кепілдендірілген тегін медициналық көмек алғашқы медициналық қараудан бастап, шұғыл жағдайдағы емдеу мен алдын алу шараларына дейінгі қызмет түрлерін қамтиды. Денсаулық сақтау министрлігінің деректеріне сүйенсек 2024 жылдың қорытындысы бойынша 3,4 млн тұрғын ел ауруханаларында стационарлық ем алған, оның ішінде 1 млн пациент кепілдендірілген көлем шеңберінде емделген.
– Мемлекет кепілдік берген медициналық көмек пакеті МӘМС жүйесіне қарамастан азаматтарға бастапқы және стационарлық көмектерді көрсетеді. Ол медициналық араласуды қажет ететін аурулар, жарақаттар немесе басқа аурулар кезінде медициналық қызметтер мен дәрі-дәрмектерге қол жеткізуді қамтамасыз етеді, – дейді Жезқазған қаласының облыстық көпбейінді ауруханасының директоры Ғабиден Аханов.
Емханаға тіркелген азаматтар да медициналық көмектің кең спектріне қол жеткізе алатынын атап өту маңызды. Ол жалпы практика дәрігерлерінің қабылдауын, тегін дәрі-дәрмекпен қамтамасыз етуді, диагностикалық ем-шараларды, шұғыл күтімді және басқа да көптеген маңызды қызметтерді қамтиды. Ұлытау облысында 13 млрд теңгеге кепілдендірілген тегін медициналық көмек көрсетілген.
– Көпбейінді ауруханада 1,5 млрд теңгеге 6800 адамға көмек көрсетілді. Обьлыс бойынша бұл көрсеткіштер әлеуметтік медициналық сақтандыру жүйесіндегі көрсеткіштермен пара-пар келеді, – дейді Ғадиден Аханов бізбен әңгімесінде.
Сондай-ақ оқыңыз
Биыл тегін медициналық көмектің кепілдендірілген көлемі және міндетті әлеуметтік медициналық сақтандыру қызметін оңтайландыру кезең-кезеңімен жүзеге асырылады. 2026 жылдан бастап 13 әлеуметтік маңызы бар ауруға күдік туындаған жағдайда тегін консультациялық-диагностикалық көмек көрсету жоспарлануда. Осылайша біздің азаматтар тегін диагностикадан өте алады, патологияларды уақтылы анықтай алады, бұл азаматтардың денсаулығын жақсартуға және созылмалы аурулары бар науқастар арасында мүгедектік деңгейін төмендетуге мүмкіндік береді.
Гүлім Маратқызы.
