Кенші мен байытушы күні қарсаңында «Қазақмыс» корпорациясы» ЖШС жанындағы Ардагерлер кеңесінің Сәтбаев қаласындағы филиалы өндірісте опат болған азаматтарды еске алып, құран бағыштады.
«Қазақмыс» корпорациясының өндіріс ошақтарында жүріп, опат болған азаматтарды еске алып, құран бағыштауға жиылған көпшіліктің қатарында өндірістің ардагерлері, марқұмдардың отбастары мен жақындары болды. Филиал жетекшісі Абулайс Мулақов сөз алып, өмірден өткен азаматтарды ұмытпай, еске алу парыз екендігін жеткізді.
– Халқымызда «Өлі разы болмай, тірі байымайды» деген аталы сөз бар. Өндірісте жүріп қазаға ұшыраған азаматтарымызды ұмытпай, еске алу біздің әрқайсымыздың азаматтық борышымыз. Сондықтан Ардагерлер кеңесінің Сәтбаев қалалық филиалы марқұмдарды еске алып, құран бағыштауда.
«Орнында бар оңалар» демекші, арамыздан кеткен жандардың артындағы ұрпақтарына, отбастарына жақсылық нәсіп болсын, – деді Абулайс Мулақов.
Келген қонақтар арнайы жайылған дәмнен ауыз тиді. Сәдуақас Ошақұлы атындағы мешіттің имамы марқұмдарға құран бағыштады.
