Елімізде қыркүйектің соңғы жексенбісінде Еңбек күні аталып өтті. Еңбегі арқылы қоғам дамуына түрлі салада үлес қосып жүрген жандарға құрмет көрсетілетін бұл мерекеде «Хабар» республикалық телеарнасының тікелей эфирінде ауқымды телемарафон ұйымдастырылды.
«Адал еңбек» деп аталған бұл телемарафонының мақсаты – еңбексүйгіштік идеясын насихаттау, еңбек адамына лайықты құрмет қалыптастыру. Сондықтан оған еңбегімен басқалардың өмірін жақсарта отырып, алайда, кадрдан тысқары қалатын әр түрлі саланың қызметкерлері қатысты.
Шақырылған қатысушылардың бірі біздің жерлесіміз – «Қазақмыс» корпорациясы» ЖШС «Нұрқазған» кенішінің үңгілеушілер бригадасының бригадирі Нұржан Аяшов болды.
Нұржан Тілепбергенұлы жиырма жылдан астам уақыт бойы үңгілеуде еңбек етіп келеді. Кен өндірісіндегі үлесі үшін ол II және III дәрежелі «Кенші даңқы» салалық төсбелгісімен марапатталған. Үңгілеуші болу бұл өндірістік үдерістің шыңы болып табылады. Осы белесті Нұржан Аяшов адал еңбегімен бағындырып келеді. Оның бригадасының табысы «Нұрқазған» кенішінің көшбасынан табылуына септігін тигізуде.
Бағдат ҚАЗКЕНОВ.
