Jezqazgan tau-ken ondirisi Шығыс Жезқазған кенішінде «Қазақмыс» корпорациясы» ЖШС Басқарма төрағасының өндіріс жөніндегі орынбасары Саят Бакировтың қатысуымен көшпелі жұмыс жиналысы өтті.
Кездесу барысында жоспарлы көрсеткіштердің орындалуы, өндірістік қауіпсіздік мәселесі және алдағы кезеңге арналған ұйымдастырушылық міндеттер қарастырылды.
Саят Бакиров кеніш өндірістік жоспарды орындап жатқанын атап өтіп, атқарылған жұмыс үшін ұжымға алғыс білдірді. Ол өндірістік қауіпсіздік жағдайына және өткен айлардағы жарақаттану фактілерін талдауға ерекше назар аударды. Ол тәуекелдерді бағалау стандарттарын қатаң ұстану мен өндірістік тәртіпті сақтау қажеттігін атап өтті.
Төбені бекіту жұмысы ерекше бақылауды талап етеді. Ол бұл процесті сапалы орындау үшін бекітушілер маркшейдерлік және геологиялық қызметпен өзара нақты іс-қимылда болуы тиіс екеніне назар аударды. Төбеде ыдырау белгісінің пайда болуына тек бекіту сапасы ғана емес, сонымен қатар бұрғылау және жару жұмыстары да тікелей әсер етеді.
Кездесу барысында кеншілерге алдағы төлемдер туралы да хабарланды. Желтоқсанда қызметкерлерге Тәуелсіздік күніне арналған біржолғы төлем («13-ші жалақы») және 2025 жылдың IV тоқсанының сыйақысы беріледі. Ақпанда жалақы инфляция деңгейіне сәйкес индекстеледі.
Осындай кездесулер жақын арада компанияның басқа өндірістік нысандарында да өткізіледі.
«Қазақмыс» корпорациясы» ЖШС PR департаменті.
